АҚШдаги ресторанда юз берган отишмада уч киши ҳалок бўлди

АҚШнинг Айдаҳо штатидаги Твин-Фолс шаҳрида жойлашган Ин-Н-Оут тезкор овқатланиш ресторанида юз берган отишма натижасида уч киши ҳаётдан кўз юмди. Қурбонлар орасида гумонланувчи шахс ҳам борлиги маълум қилинди. Шунингдек, бир неча киши турли даражадаги жароҳатлар олди. Бу ҳақда Реутерс агентлиги хабар берди.

Маҳаллий полиция ҳодиса юзасидан тергов ишларини олиб бормоқда.

Гувоҳлардан бирининг сўзларига кўра, у светофорда тўхтаб турганида, автомобилларга хизмат кўрсатиш йўлагидан автоматик милтиқ кўтарган эркак чиқиб келган. Кейинроқ, қўлида тўппонча бўлган бошқа бир эркак унга қарата ўқ узган. Камида уч марта ўқ овози эшитилган.

Ижтимоий тармоқларда тарқалган видеоларда қуролланган икки эркак тасвирланган.

Отишма пайтида ресторан ходимлари ҳам жабрланган бўлиши мумкин. Гувоҳлардан бирининг айтишича, у Ин-Н-Оут ходимларидан бири кўкрагидан ўқ еган аёл ҳамкасбини автотураргоҳ бўйлаб судраб кетаётганини кўрган. Аёлнинг рестораннинг хизмат кийимида бўлгани айтилмоқда. Ҳозирча отишма сабаблари расман эълон қилинмаган.

Тахминан 56 минг аҳоли истиқомат қиладиган Твин-Фолс шаҳри Айдаҳо штатининг жанубида жойлашган. Мазкур штат АҚШдаги қуролга оид қонунлари энг юмшоқ ҳудудлардан бири ҳисобланади. Бу ерда ўқотар қуролни олиб юриш учун махсус рухсатнома ёки рўйхатдан ўтказиш талаби мавжуд эмас.

Аввалроқ, 26-июл куни АҚШнинг Сиетл шаҳри марказида озиқ-овқат фестивалида отишма содир бўлган эди. Натижада уч киши ҳалок бўлган ва тўрт киши, жумладан, бир нафар гўдак яраланган эди.