Сара Шарифнинг бобосига унинг Покистондаги сингиллари ва уқаларининг васийлиги берилди

Сара Шарифнинг бобосига унинг Покистондаги ака-ука ва опа-сингилларининг васийлиги берилди

Сара Шарифнинг ака-ука ва опа-сингиллари Покистонда бобоси билан қолади

Покистон суди Сара Шарифнинг ота томондан бобосига унинг ака-ука ва опа-сингилларининг васийлигини берди.

Ушбу қарор 10 ёшли Сара 2023 йилда отаси ва ўгай онаси томонидан ўлдирилганидан кейин юзага келган кўп йиллик ҳуқуқий ноаниқликдан сўнг чиқарилди.

Болаларнинг бобоси уларнинг Британия фуқаролиги сақланиб қолишини ва бу келажакда Буюк Британияга қайтишни хоҳлаш-хоҳламасликларини ўзлари ҳал қилишларига имкон беришини айтди.

Ҳозирда ёши 4 дан 16 ёшгача бўлган беш нафар боланинг барчаси 2023 йилдан бери Покистонда яшаб келмоқда. Улардан судда судья билан гаплашиш сўралди ва энг каттаси улар ўзларини қулай ҳис қилаётганликларини ва ака-ука ҳамда опа-сингиллар жойлашиб олишганини айтди.

Судья уларга бобоси васий бўлишини айтганида, энг катта бола: «Жуда яхши», деб жавоб берди.

Беш нафар бола 2023 йилнинг августидан бери Покистонда бўлиб туришибди, ўшанда уларни Сара ўлдирилганидан сўнг Саранинг отаси, ўгай онаси ва амакиси у ерга олиб кетишган эди.

Милитсия болаларни бобосининг уйидан топгунга қадар оила бир неча ҳафта яшириниб юрган. Улар дастлаб давлат қарамоғидаги болалар муассасасига жойлаштирилган.

Катталар самолётда Буюк Британияга қайтиб келишган ва аэропортда ҳибсга олинган. Саранинг отаси Урфан Шариф ва ўгай онаси Беинаш Батул Саранинг қотиллигида айбдор деб топилди. Шариф камида 40 йилга, Батул эса камида 33 йилга озодликдан маҳрум этилди.

Унинг амакиси Файсал Малик унинг ўлимига сабабчи бўлиш ёки йўл қўйиб беришда айбдор деб топилди ва 16 йилга озодликдан маҳрум этилди.

Саранинг жасади Суррей графлигининг Уокинг шаҳридаги оилавий хонадондан топилишидан олдин, икки йил давом этган «қийноқлар кампанияси» пайтида унга ниқоб кийдирилган, ёқилган ва калтакланган.

Саранинг отаси Урфан Шариф ва ўгай онаси Беинаш Батул унинг ўлими учун умрбод қамоқ жазосига ҳукм қилинди

Покистонда Саранинг бобосига 2023 йил октябр ойида унинг ака-ука ва опа-сингилларига вақтинчалик васийлик берилган эди. Бобонинг айтишича, энг кичигидан ташқари ҳаммаси ҳозирда Покистонда мактабга бормоқда.

Болалар Англияда суд қарамоғига олинган эди ва Суррей графлиги кенгаши уларни Покистон судлари орқали қайтариб олиб келишга ҳаракат қилаётган эди.

Уларнинг бобоси болалар у билан қолиши учун курашиб келмоқда. Суррей июн ойида Англиядаги суд жараёнлари якунланаётгани сабабли Покистонда аризани давом эттириш имкониятига эга эмаслигини айтиб, ишдан чекинди.

Шанба кунигача Покистон судларида уларнинг васийлиги бўйича якуний қарор қабул қилинмаган эди.