Россиялик шахматчилар Ўзбекистонда ўтадиган олимпиадада иштирок этмайди
ФИДЕ россиялик гроссмейстерларни Самарқандда ўтадиган Бутунжаҳон шахмат олимпиадасидан маҳрум қилди.
Россиялик шахматчилар Ўзбекистонда бўлиб ўтадиган олимпиадада иштирок этмайдиган бўлишди. Россия шахмат федерацияси (РШФ) маълум қилишича, Россиянинг эркаклар ва аёллар терма жамоалари 15-сентабрда Самарқандда бошланадиган Бутунжаҳон шахмат олимпиадасида қатнашмайди.
Ушбу мусобақада уларнинг ўйнашига рухсат бермаслик ҳақидаги қарор Халқаро шахмат федерацияси (ФИДЕ) кенгаши томонидан 23-август куни бўлиб ўтган йиғилишида "Россия масаласи" кўриб чиқилгандан сўнг қабул қилинди. ФИДЕ кенгаши ташкилотнинг олий ижро органи ҳисобланади.
Бу Ченнай–2022 (Хитой) ва Будапешт–2024 (Венгрия) олимпиадаларидан кейин Россиясиз ўтадиган кетма-кет учинчи турнир бўлади.
Аввалроқ, 2025-йил январ ойида ФИДЕ кенгаши Россия ва Беларуснинг болалар-ўсмирлар ва паралимпия жамоаларини расмий мусобақаларга қўйишга рухсат берган эди. Ўша йилнинг июн ойида эса Россия аёллар терма жамоасининг жамоавий жаҳон чемпионатида иштирок этиши маъқулланган ва якунда терма жамоа бу мусобақада ғолиб чиққан эди. Бу ҳолат санксияларни юмшатиш томон кетаётганини кўрсатарди.
Бироқ, 2026-йил 10-июн куни ФИДЕ Спорт арбитраж суди (САС) қарорини бажармагани учун Россия шахмат федерациясининг (РШФ) аъзолигини вақтинча тўхтатиб қўйди. САС қарорига кўра, РШФ Украинанинг босиб олинган Қрим, Севастопол, ДХР, ЛХР, Херсон ва Запорожье вилоятларида шахмат фаолиятини бошқаришни ҳамда тадбирлар ўтказишни тўхтатиши керак эди.
РШФ ижрочи директори Александр Ткачёвнинг хабар беришича, 2026-йил 23–24-август кунлари ФИДЕ Президент кенгаши россиялик гроссмейстерларни Бутунжаҳон олимпиадасига қўймаслик ҳақида қарор қабул қилган. Унинг сўзларига кўра, кенгаш аъзоларининг аксарияти Россия терма жамоасининг иштирокига қарши чиққан. Ткачёв бу ташаббус ФИДЕ президенти вазифасини бажарувчи Вишванатан Ананддан чиққанини таъкидлади.
Эслатиб ўтамиз, ФИДЕ президенти ваколатларини бажаришни тўхтатган россиялик Аркадий Дворкович июл ойида Европа Иттифоқи унга қарши санксиялар жорий қилганидан сўнг ўзини четга олган эди. Ҳозирда президент вазифасини Вишванатан Ананд бажармоқда.