Россияга ишлаш учун кетаётган ўзбекистонликлар сони 13 фоизга камайди
2026-йилнинг биринчи ярмида Россияда меҳнат фаолиятини олиб борган ўзбекистонликлар сони 1,18 млн нафарни ташкил этди. Бу ўтган йилнинг шу даврига нисбатан 13,2 фоиз кам, дейилади Ўзбекистон Марказий банки шарҳида. Туркия ва Европанинг бошқа давлатларига мигрантлар оқимининг сезиларли ўсиши кузатилмоқда. Ярим йилда Ўзбекистонга 5,5 млрд доллар (+13,1%) пул ўтказмалари келиб тушган.
Россияга ишлаш учун кетаётган ўзбекистонликлар сони 13 фоизга камайди
Ўзбекистон Марказий банки 2026-йил ИИ чорак учун меҳнат бозори шарҳини эълон қилди. Унда ташқи меҳнат миграциясидаги тенденсиялар ҳам баён этилган.
Қайд этилишича, 2026-йил январ-июн ойларида Россияга ишлаш мақсадида борган Ўзбекистон фуқаролари сони 1,18 млн нафарни ташкил этган. Бу кўрсаткич 2025-йилнинг шу даврига нисбатан 13,2 фоизга кам. Патент асосида ишлаётган ўзбекистонликлар сони ҳам 9,2 фоизга қисқарган.
Шу билан бирга, ўзбекистонлик меҳнат мигрантлари учун бошқа йўналишларнинг аҳамияти ортиб бормоқда. Марказий банк маълумотларига кўра, Туркия, Жанубий Корея, Европа ва АҚШдаги ўзбекистонликлар сони сўнгги йилларда сезиларли даражада ошган.
Мигрантлар оқимининг юқори ўсиши асосан Европа ва Туркия ҳиссасига тўғри келган. 2025-йилда Европа Иттифоқидаги ўзбекистонлик мигрантлар сони 13,2 фоизга, Туркияда эса 10,7 фоизга кўпайган. 2026-йил 1-июл ҳолатига Туркиядаги ўзбекистонликлар сони 70 минг нафарни (9,3 фоиз ўсиш) ташкил этган, Жанубий Кореядагилар сони эса 102,2 минг нафарга (3,3 фоиз ўсиш) етган.
Мигрантлар юбораётган пул ўтказмалари ҳам ўсишда давом этган. 2027-йил И чорагида пул ўтказмалари 3,8 млрд долларни ташкил этиб, йиллик ҳисобда 12,9 фоизга ошган. ИИ чоракда эса бу кўрсаткич 5,5 млрд долларга етиб, ўсиш суръати 13,1 фоизни ташкил қилган.
Пул ўтказмалари географияси ҳам кенгаймоқда. Январ-июн ойларида Қозоғистондан келган пул ўтказмалари 28,2 фоизга, АҚШдан 18,8 фоизга, Туркиядан 14,2 фоизга ва Жанубий Кореядан 11,4 фоизга ошган. Россиядан келаётган пул ўтказмалари эса 8,8 фоизга кўпайган.
Эслатиб ўтамиз, 2026-йилнинг биринчи чорагида умумий пул ўтказмалари таркибида Россиядан жўнатилган маблағлар улуши бир йил олдингига нисбатан 5,2 пунктга пасайиб, 72,4 фоизга тушганди.