Россиядаги ҳарбий мавзудаги энг йирик телеграм-канал асосчиси Черногорияда қўлга олинди
У ижтимоий тармоқлардаги саҳифаларида санксия остида эканига қарамай, ушбу мамлакатга кира олгани билан мақтаниб, унинг маълумотларини текширмаган чегарачини ҳақоратлаганди.
Россиядаги ҳарбий мавзудаги энг йирик телеграм-канал асосчиси Черногорияда қўлга олинди
Черногорияда Рйбар телеграм-канали асосчиси ушланган.
Михаил Звинчук рафиқаси ва каналнинг уч нафар ходими билан бирга 9-октабр тонгида Рисан шаҳрида қўлга олинган. Маҳаллий Вижести нашрига кўра, улар билан бирга «мураккаб рақамли жиҳозлар», шунингдек, дронлар ва «электрон қурилмалар» топилган. Черногория махсус хизматлари Звинчук ва унинг жамоасини бир неча кун давомида кузатиб борган. ОАВ хабарига кўра, бу операция Рйбар каналлари тармоғининг «гибрид фаолиятини тўхтатиш»га қаратилган.
Звинчукка қандайдир айблов қўйилгани номаълум.
Ҳуқуқ-тартибот органлари бу ҳолат юзасидан расмий баёнот бермаган. Черногория бош вазири Милойко Спаич Х ижтимоий тармоғида ҳукумат «хавфсизлик хизматлари ваколатида қолиши керак бўлган маълумотни эълон қилиш» ниятида эмаслигини билдирган. «Аммо „Рйбар“ ахборот тармоғи раҳбари қўлга олинган бугунги муваффақиятли амалиётдан кейинги хабар жуда аниқ: давлат институтлари ўз вазифаларини бажармоқда, Черногория ўз манфаатларини ҳимоя қилмоқда ва ҳеч ким бизнинг Европа келажагимизни хавф остига қўя олмайди», – дея ёзган у.
Рйбаръдагилар жамоа аъзолари қўлга олинганини тасдиқлаган.
Телеграм-каналда эълон қилинган постда қўлга олинганларнинг барчасининг Черногорияда бўлиши қонуний ва расмий экани таъкидланган. «Хусусан, расмий сўров асосида Сетинский монастирида тасвирга олиш ишлари режалаштирилганди», – дейилади хабарда. Шунингдек, қўлга олинганлар томонидан «маҳаллий қонунчиликни бузиш ҳолатлари бўлмагани» қайд этилиб, улар тез орада озод этилишига умид билдирилган. Звинчук ҳақиқатан ҳам Черногорияга ошкора ташриф буюрган — шу кунларда у у ерда олган видеосини РуТубеъдаги каналига жойлаган. Инстаграмдаги саҳифасида эса Европа Иттифоқи, Буюк Британия ва Черногория ҳукумати санксиялари остида бўлишига қарамай, ушбу мамлакатга кира олгани ҳақида ёзган: «Сиз ҳар доим барча чўнтакларни кавлайдиган, лекин маълумотлар базасига қарашни унутадиган аҳмоқ чегарачига дуч келишингиз мумкин».
Россия ҳукумати ҳибсга олинганларга дипломатик ёрдам кўрсатилишини ваъда қилган.
«Дипломатларимиз ҳибсга олиш сабабларини аниқлайди ва Россиянинг ҳар бир фуқароси билан бўлгани каби унинг ҳуқуқларини ҳимоя қилиш билан ҳам шуғулланади», – деди Россия президенти матбуот котиби Дмитрий Песков. Россия Хавфсизлик кенгаши раҳбари ўринбосари Дмитрий Медведев эса россияликлар Европа мамлакатларида «бекорга изғиб юргани»ни айтди ва Россияда европаликлар ва хорижликларни «айирбошлаш фонди»ни шакллантиришга чақирди.