Россия зарбалари Украинада 28 кишининг ҳаётига зомин бўлди
Россиянинг 7-октабрдаги ракета ва дрон ҳужумлари оқибатида Украинада 28 киши ҳалок бўлди, деб билдирди мамлакат ички ишлар вазири Иван Виговский. Прилуки шаҳридаги кўп қаватли уйга зарба натижасида 20 киши, жумладан, беш бола ҳаётдан кўз юмган.
Россия зарбалари Украинада 28 кишининг умрига зомин бўлди
Виговский 7-октабр оқшомида берган маълумотга кўра, қутқарувчилар ва полиция ходимлари вайроналар остидан, шикастланган бинолардан ҳамда ёнғинлардан жами 29 кишини қутқариб олишган.
Украина президенти Володимир Зеленский шу куни кечқурун ҳужумлар оқибатида 100 киши жароҳат олганини билдирган. Унинг айтишича, Россия баллистик ва қанотли ракеталар ҳамда «Шаҳед» дронларидан фойдаланган. Кундузи ҳам дронлар ва авиабомбалар билан янги зарбалар берилган.
Энг оғир оқибатлар Чернихив вилоятининг Прилуки шаҳрида қайд этилган. Бу ерда ракета кўп квартирали турар жой биносига келиб тушган. Ички ишлар вазири маълумотига кўра, ҳалок бўлган беш боланинг учтаси бир ёшда бўлган.
Вазир бу ҳақда хабар берган пайтда Прилукида вайроналарни тозалаш ҳамда қидирув-қутқарув ишлари 14 соатдан ортиқ давом этаётган эди. Чернихив вилояти ҳарбий маъмурияти раҳбари Вячеслав Чаус аввалроқ шаҳарда 50 дан зиёд киши жабрланганини айтган.
Зеленскийнинг сўзларига кўра, 7-октабр куни Украинадаги 13 ҳудуд ҳужумга учраган. Россия қўшинлари 70 та ракета, шунингдек, зарбадор дронлардан фойдаланган.
Украина президенти халқаро етакчиларни ҳужумларга муносабат билдиришга чақирган. У Россияга нисбатан санксияларни юмшатиш ёки айрим олигархларга қўйилган чекловларни олиб ташлаш ҳақидаги сигналларни танқид қилган.
Зеленский фикрича, Россиянинг нефт сотишдан даромад олишда давом этаётгани урушни молиялаштириш имконини сақлаб қолмоқда. У буни Украина билан бирга Европа ва Ғарб мамлакатлари учун ҳам муаммо деб баҳолаган.
Қурбонлар ва жароҳатланганлар ҳақидаги рақамлар Украина расмийларининг 7-октабр кечқурунги баёнотларига асосланган.