Россия Украина томонида жанг қилган америкаликни АҚШга қайтарди
Украина мудофаасида иштирок этган Стивен Ҳаббард асирликка тушгач, қарийб етти йил муддатга қамалганди. Уиткофф билан учрашуви арафасида Путин уни «Трампга ҳурмат юзасидан» озод қилиб юборди.
Россия Украина томонида жанг қилган америкаликни АҚШга қайтарди
Владимир Путин Россия суди томонидан ёлланишда айбланиб қамалган АҚШ фуқароси Стивен Ҳаббардни озод қилди.
Бу ҳақда Путин Санкт-Петербургда АҚШ президентининг махсус вакили Стив Уиткофф билан учрашув бошланаётган пайтда маълум қилди. Россия президенти Ҳаббард аллақачон Пулково аеропортида эканини ҳам қўшимча қилди. У Уиткофф билан бирга Ослога учиб кетиши кутилмоқда.
Расмий таърифга кўра, Ҳаббард «эзгу ният белгиси сифатида» озод этилган.
Доналд Трамп ҳам бу бир томонлама қадам бўлганини ва Россия «президент Трампга ҳурмат юзасидан» бунинг эвазига ҳеч нарса талаб қилмаганини айтди. АҚШ президенти, шунингдек, илгари Россияга «дарҳол» санксиялар жорий этишни талаб қилганлар энди «узр сўраб қўнғироқ қилаётгани»ни қўшимча қилди.
Москва шаҳар суди Ҳаббардга оид ҳукмни 2024-йил октабрида чиқарган эди.
Ўша пайтда у 72 ёшда эди. Терговчиларга кўра, бу америкалик 2014-йилдан бери Украинада яшаган ва 2022-йил февралида Харкив областидаги ҳудудий мудофаа бўлинмасига қўшилган. Бир ой ўтиб у россиялик ҳарбийлар томонидан асирга олинади ва ёлланиш моддаси (Россия Федерацияси Жиноят кодексининг 359-моддаси 3-қисми) бўйича айбдор деб топилади. Прокуратура уни етти йилга озодликдан маҳрум этишни сўраган, суд эса олти йил-у ўн ойга ҳукм қилган. Иш икки мажлисда ёпиқ тартибда кўриб чиқилган. Россия расмийларига кўра, америкалик судда айбини тан олган. Шу билан бирга, Ҳаббарднинг синглиси интервюсида у инглиз тили ўқитувчиси бўлиб ишлагани, россияпараст эканини ва қурол ишлатишни билмаслигини айтган.
Асирликда Ҳаббард қийноққа солинган.
Россия асирлигидан қайтган ва америкаликка ҳукм эълон қилинишигача у билан бир хонада сақланган украиналик собиқ маҳбус Игор Чичконинг айтишича, Ҳаббард ва у билан бирга ўтирган украиналик ҳарбийлар калтакланган, камситилган ва очликка маҳкум қилинган. «Ҳамма қатори уни ҳам мунтазам равишда калтаклашарди. Уни таёқ ва тўқмоқ билан уришар, тепкилашарди. Итларга талатишар, овқат беришмас, йўлакларда эмаклашга мажбур қилишарди», – деган у. Ҳаббарднинг ўзи Чичкога электр токи билан ҳам қийнашганини айтиб берган.