Россия ҳар ойда фронтда жалб қилаётганидан 6 минг нафар кўпроқ аскар йўқотмоқда
Россия Украинадаги уруш учун кунига қарийб минг нафар янги ҳарбийни жалб қилаётганига қарамай, бу кўрсаткич ҳалок бўлган ва яраланганлар ўрнини тўлдириш учун етарли бўлмаяпти. Ғарб расмийлари ҳисоб-китобига кўра, Россиянинг жанглардаги йўқотишлари билан янги жалб қилинаётган ҳарбийлар сони ўртасидаги фарқ ойига қарийб 6 минг нафарни ташкил этмоқда.
Россия ҳар ойда фронтда йўқотаётган аскарлари сони янги жалб қилинаётганлардан 6 минг нафарга кўпроқ. Бу ҳақда Тҳе Гуардиан нашри Ғарб расмийларига таяниб хабар берди.
Маълумотларга кўра, Россия ҳукумати ҳозирда кунига ўртача 1000 нафар янги ҳарбийни армия сафига олмоқда. Бироқ, сўнгги икки ой давомида бу суръат ҳам фронтда ҳалок бўлган ва яраланган ҳарбийлар ўрнини тўлиқ қоплаш учун етарли бўлмаган.
"Бизнинг ҳисоб-китобларимизга кўра, Россиянинг жанглар натижасида йўқотаётган ҳарбийлари билан жалб қилишга муваффақ бўлаётган одамлари ўртасидаги фарқ ҳозирда ойига тахминан 6 минг нафарни ташкил этмоқда", - деган нашр билан суҳбатлашган Ғарб расмийларидан бири.
Манбага кўра, Россиянинг янги ҳарбийларни жалб қилиш ҳисобига фронтдаги катта йўқотишларни қоплаш имконияти чекланган. Ғарб расмийлари бу ҳолатни Москва сўнгги вақтларда Украина инфратузилмасига ҳаво зарбаларини кучайтирганини изоҳловчи омиллардан бири сифатида кўрмоқда.
Тҳе Гуардиан келтирган маълумотларга кўра, июл ойи бошидан буён Россия армияси Украинага 360 дан ортиқ ракета учирган. Нашр бу жараёнда Киевнинг баллистик ракеталарга қарши мудофаа воситалари етишмаслиги ҳам муҳим омил бўлаётганини қайд этган.
Ғарб расмийларидан бирининг фикрича, Россия қиш мавсумида Украина энергетика инфратузилмасига зарбалар бериш орқали мамлакат аҳолиси ва жамиятининг руҳий барқарорлигига босим ўтказишга уриниши мумкин.
Шу билан бирга, Ғарб расмийлари Россияда янги кенг кўламли сафарбарлик эълон қилиниши эҳтимоли сиёсий ва иқтисодий жиҳатдан жиддий таваккалчиликларни келтириб чиқариши мумкинлигини таъкидламоқда.
Бунда 2022-йил кузида Россияда қисман сафарбарлик эълон қилинганидан кейин мамлакатни кўплаб фуқаролар тарк этгани эслатилган. Тҳе Гуардиан келтирган баҳога кўра, ўша даврда Россиядан қарийб бир миллион киши чиқиб кетган ва улар орасида юқори малакали мутахассислар ҳам кўп бўлган.
Бундан ташқари, янги сафарбарлик эълон қилинган тақдирда Россия армияси бир неча юз минг нафар янги ҳарбийни қисқа вақт ичида қабул қилиш, тайёрлаш ва зарур жиҳозлар билан таъминлаш имкониятига эгами, деган савол ҳам очиқ қолмоқда.