Раҳим Стерлинг икки йилга қамалиши мумкин — Тҳе Сун

**Раҳим Стерлинг икки йилга қамалиши мумкин – Тҳе Сун хабарига кўра**

Англия терма жамоасининг собиқ вингери ва тўрт карра мамлакат чемпиони Раҳим Стерлинг хавфли ҳайдаш, автомобилида тақиқланган азот оксиди газини сақлаш ҳамда йўл-транспорт ҳодисасидан сўнг таҳлил топширишдан бош тортгани учун икки йилгача озодликдан маҳрум этилиши мумкин. Бу ҳақда Тҳе Сун нашри маълум қилди.

Воқеа 28-май куни Хемпшир графлигидаги М3 трассасида содир бўлган. Полиция маълумотларига кўра, Стерлинг ўзининг Ламборгҳини русумли автомобилида ҳаракатланаётиб, йўл четидаги тўсиқларга урилган. Ушбу ЙТҲда бошқа автомобиллар зарар кўрмаган ва жабрланганлар йўқ. Футболчига нисбатан хавфли ҳайдаш, автомобил салонида тақиқланган газни сақлаш ва ҳибсга олингандан сўнг алкогол ёки гиёҳванд моддалар бўйича таҳлил топширишдан бош тортиш айбловлари қўйилган. Агар унинг айби судда тасдиқланса, у икки йилгача қамоқ жазосига ҳукм қилиниши мумкин.

Ҳодисадан кейин ҳибсга олинган ва гаров эвазига озодликка чиқарилган футболчи 15-сентябр куни Бейзингсток шаҳри судида кўрсатма беради.

Маълумот учун, Раҳим Стерлинг Нидерландиянинг “Фееноорд” клубини тарк этгач, ҳозирда эркин агент мақомида. Фаолияти давомида у “Ливерпул”, “Манчестер Сити”, “Челси” ва “Арсенал” каби клубларда ўйнаган. “Сити” сафида тўрт марта Англия чемпионлигини, шунингдек, Англия Кубоги ва беш марта Лига Кубогини қўлга киритган. Стерлинг Чемпионлар Лигасида тўртта турли инглиз клуби сафида майдонга тушган тарихдаги ягона футболчи ҳисобланади. У Англия терма жамоаси таркибида 82 та ўйин ўтказиб, 20 та гол урган ҳамда иккита Европа (2016, 2020) ва учта жаҳон чемпионатида (2014, 2018, 2022) иштирок этган.