“Қурилишда ишлайсан дейишганди” – Россия армиясига ёлланган йигит фронтда мина босиб олиб, бармоқларидан айрилди
Қувасойлик йигит аввалига Россияда ҳужжациз транспорт воситасини бошқаргани учун 1,5 йилга қамалган. Сўнгра қамоқдан Украинанинг босиб олинган ҳудудларида қурилишда ишлаш алдови билан фронтга жўнатилган. Жароҳатланган аскарларни жанг майдонидан олиб чиқишда ерга кўмилган минани босиб олган. Оқибатда ўнг оёғи бармоқлари узилиб тушган.
“Қурилишда ишлайсан дейишганди” – Россия армиясига ёлланган йигит фронтда мина босиб, бармоқларидан айрилди
Фарғонада Россия армиясига ёлланган эркакка нисбатан жиноий жазо қўлланди.
Суд ҳукмига кўра, 29 ёшли З.Т. 2019-йилдан бери мавсумий тарзда Россияга қатнаб, ишлаб келган. 2023-йил баҳорида қўшнисининг таклифи билан Москва шаҳрига бориб, етказиб берувчи сифатида ишлаган. 2024-йил июн ойида ҳужжациз транспорт воситасини бошқаргани учун судланиб, 1,5 йилга озодликдан маҳрум этилган.
Жазони ўташ чоғида унга Украинанинг Россия томонидан босиб олинган ҳудудларида қурилиш ишларида ишлаш таклиф қилинган. Бунинг эвазига жазо қўлланмаслиги ваъда қилинган.
З.Т. бу таклифга рози бўлган. Аммо у қурилишга эмас, фронтга олиб кетилган.
З.Т. судда алдов йўли билан шартнома имзолаттиришганини айтган.
500 нафарга яқин мигрантни Курск вилоятининг Суджа шаҳри яқинига олиб кетишди. У ерда бизга қурилиш эмас, Россия-Украина ўртасидаги урушда қатнашиш учун шартнома имзолаттиришди
Шундан сўнг З.Т. “Питон” шартли лақаби остида жангларда қатнашган. У жароҳатланган ва вафот этган аскарларни жанг майдонидан олиб чиқувчи гуруҳда оддий аскар бўлиб хизмат қилган.
2024-йил 25-декабр куни 4 нафар шеригим билан жароҳатланган аскарларни жанг майдонидан олиб чиқиш вақтида эҳтиёцизлик қилиб, ерга кўмилган минани босиб олдим. Мина портлаб, ўнг оёғим бармоқлари узилиб кетди
Сўнг уни ҳарбий госпиталга жўнатишган. У ерда 7 ой давомида даволанган. Шу вақт ичида З.T.ga Россия фуқаролиги берилган, медал билан тақдирланган, протез оёқ тақдим қилинган.
З.Т. 2026-йил апрел ойида Ўзбекистоннинг Москва шаҳридаги элчихонасига бориб, фуқаролик паспортини йўқотиб қўйганини айтган. Сўнг 30-апрел куни ватанга қайтиш гувоҳномаси билан Ўзбекистонга қайтиб келган.
ЖИБ Қувасой шаҳар судининг ҳукми билан З.Т. Жиноят кодексининг 154-моддаси (ёлланиш) 1-қисмида назарда тутилган жиноятни содир қилишда айбли деб топилган. Унга Жиноят кодексининг 57-моддасини қўллаган ҳолда 4 йил муддатга озодликни чеклаш жазоси тайинланган.