Қозоғистондаги бургут 1400 км учиб Қашқадарёга келди
Туғилганига атиги бир неча ой бўлган бургутнинг парвози ГПС трекер ёрдамида кузатилмоқда. У аллақачон учта давлатни кесиб ўтган.
Қозоғистондан учган бургут 1400 км йўл босиб Қашқадарёга етиб келди
Қозоғистонда туғилганига бир неча ой бўлган дашт бургути қарийб 1400 километр учиб Қашқадарёга келди. Бу ҳақда Тенгриневс хабар берди.
Тўнғиш лақабли бургут иссиқ ўлкаларга ўзининг илк мустақил сафарини бошлаган. Унинг ҳаракатини Қозоғистоннинг “Олтин-Эмел” миллий боғи мутахассислари кузатиб бормоқда.
“У атиги бир неча ойлик бўлса-да, аллақачон учта давлатни учиб ўтди. Ёзда инида ўтирган оппоқ, момиқ полапон эди. 20-июл куни миллий боғ ходимлари Зоология институти мутахассислари билан биргаликда унга қуёш батареясида ишлайдиган ГПС-трекер ўрнатди”, дейилади миллий боғ хабарида.
2-ноябр куни эълон қилинган хабарга кўра, бургут аллақачон Қозоғистон ҳудудидан чиқиб, Қирғизистонни кесиб ўтган ва Ўзбекистоннинг Самарқанд шаҳригача етиб келган.
“Олтин-Эмел → Қонаев → Олмаота → Бишкек → Тараз → Чимкент → Самарқанд. Ҳозирда Тўнғиш Ўзбекистонда — Қашқадарё вилоятининг Қарши шаҳри яқинида бўлиб турибди. У шу пайтгача тахминан 1400 километр масофани ортда қолдирди”, дея таъкидлади миллий боғ расмийлари.
Улар дашт бургути Қизил китобга киритилганини эслатиб ўтди. ГПС-трекер орқали олинган маълумотлар мутахассисларга қушлар учун хавф туғдириши мумкин бўлган ҳудудларни аниқлаш ва уларни ҳимоя қилиш чораларини ўз вақтида кўриш имконини беради. Тўнғиш қишлайдиган жойига етиб боргунига қадар унинг ҳаракати кузатиб борилади.
Маълумот учун, Ҳиндистонда 2025-йилда жароҳатланган ҳолда топилиб, муолажа қилинган тасқара кутилмаган миграцияни амалга оширган эди. ГПС-трекинг мосламаси орқали кузатилган қуш Покистон ва Афғонистонни кесиб ўтиб, 2026-йил 4-май куни Ўзбекистонга келганди.