Қозоғистон президенти Россияни Туркий давлатлар ташкилоти таркибига киритишни таклиф қилди
Қозоғистон Президенти Қасим-Жомарт Токаев Россиянинг Туркий давлатлар ташкилотига қўшилиши ёки унда кузатувчи сифатида иштирок этиши имкониятини кўриб чиқишни таклиф қилди. У бу ТДТ нуфузини ошириши ва унинг аъзоларига фойда келтириши мумкинлигини таъкидлади.
Қозоғистон президенти Россияни Туркий давлатлар ташкилоти таркибига киритишни таклиф қилди
Қозоғистон президенти Қасим-Жомарт Токаев Анқарада ўтказилган Туркий давлатлар ташкилоти саммитида Россияни бирлашма таркибига киритиш таклифи билан чиқди.
«Ташкилотимиз обрўсини ошириш мақсадида Россиянинг ниятига ижобий муносабат билдириш ва унга ушбу форматга қўшилишни ёки ТДТ фаолиятида кузатувчи сифатида иштирок этишни таклиф қилиш тўғри ва адолатли қарор бўлар эди», — деди Токаев.
Қозоғистон раҳбари Россия «асрлар давомида туркий дунё билан яқин алоқаларни сақлаб келаётгани»ни, бу мамлакат ҳудудида эса кўплаб туркий халқлар вакиллари яшашини таъкидлади.
«Ҳозирги вақтда Россия Қозоғистон қўллаб-қувватлаётган „Олтой — туркий цивилизация бешиги“ лойиҳасини илгари сурмоқда. Рус тилидаги кўплаб сўзлар туркий келиб чиқишга эга. Умуман олганда, агар Россия туркий мамлакатларнинг, яъни ташкилотимизнинг бир қисмига айланса, бу барча давлатларимиз учун фойда келтирган бўлар эди», — деди у.
Токаев, шунингдек, жорий йилнинг май ойида Туркистонда бўлиб ўтган ТДТнинг норасмий саммитидаги баёнотини эслатиб ўтди. «Мен Туркий давлатлар ташкилоти ҳарбий альянс эмаслиги ва келажакда ҳам ҳарбий альянсга айланмаслиги кераклигини маълум қилган эдим. Бу Қозоғистоннинг позициясидир», — дея таъкидлади у.