Қориндаги ёғ юрак-қон томир касалликларидан дарак беради — тадқиқот

Қориндаги ёғнинг юрак-қон томир касалликлари билан боғлиқлиги тадқиқотда аниқланди.

Олимлар 20 йил давомида 250 мингдан ортиқ кишини кузатиб, бел ўлчами юрак хасталиги хавфини тана массаси индексидан (ТМИ) кўра аниқроқ кўрсатиши мумкинлигини аниқладилар. Тадқиқотда юрак хуружи, инсулт ва юрак етишмовчилиги каби касалликлар ўрганилди. ТМИ меъёрида бўлса ҳам, бели катта одамларда юрак касаллиги хавфи юқорироқ экани маълум бўлди.

Мутахассисларнинг таъкидлашича, ТМИ танадаги ёғ миқдори ёки унинг қаерда тўпланганини кўрсатмайди. Айниқса, қорин ва ички аъзолар атрофидаги ёғ қон босими, қондаги шакар ва холестерин миқдорини ошириши мумкин.

**Бел ўлчами қанча бўлса, хавф юқори ҳисобланади?**

Аёлларда бел айланаси тахминан 89 сантиметрдан, бел-сон нисбати эса 0,85 дан юқори бўлса, бу кўрсаткичлар юқори ҳисобланади. Эркакларда эса бу чегаралар тахминан 102 сантиметр ва бел-сон нисбати 0,90 дан юқори бўлиши билан белгиланади.

Агар кўрсаткичларингиз ушбу чегаралардан юқори бўлса, юрак-қон томир касалликлари хавфини баҳолаш учун шифокор билан маслаҳатлашиш тавсия этилади.

Тара Наруланинг сўзларига кўра, буни уй шароитида ҳам қилиш мумкин. Бунинг учун кийимсиз ёки юпқа кийимда метрдан фойдаланинг. Белни унинг энг кенг ёки юқори қисмидан, сонни эса энг кенг жойидан ўлчанг. Кейин бел ўлчамини сон ўлчамига бўлинг.

Мутахассислар тадқиқот натижалари тиббиёт амалиётида муҳим аҳамиятга эга бўлиши мумкинлигини таъкидламоқда. Чунки бел кўрсаткичларини ҳисобга олиш орқали ТМИ кўрсаткичидан келиб чиқиб баҳоланганидан юқори ёки паст юрак-қон томир хавфига эга одамларни аниқлаш осонлашиши мумкин.