Қўшма ўқув машғулотлари доирасида
Қозоғистон армияси Россияга йўл олди. Бу ҳақда республика Мудофаа вазирлиги хабар бермоқда. Идора маълумотларига кўра, Қозоғистон армиясининг шахсий таркиби ва ҳарбий техникаси КХШТ ўқув машғулотларида иштирок этиш учун Россияга жўнаб кетмоқда.
«Жорий йилнинг 24 сентябридан 3 октябрига қадар Россия Федерацияси ҳудудида КХШТнинг «Ўзаро ҳамкорлик — 2026», «Қидирув — 2026» ва «Эшелон — 2026» ўқув машғулотларини ўтказиш режалаштирилган. Машғулотларга тайёргарлик кўриш ва уларни ўтказиш доирасида 21 сентябрдан 5 октябргача ҳарбий техника ва шахсий таркибнинг темир йўл транспорти орқали Қозоғистон Республикаси ҳудуди бўйлаб Мисяш станциясигача (Челябинск вилояти, Россия) ва орқага режали ҳаракатланиши амалга оширилади», — дейилади Мудофаа вазирлиги баёнотида.
Ўқув машғулотлари давомида дала машғулотлари бўлиб ўтади, унда қўшинларни қайта гуруҳлаш, қўмондонлик бошқаруви ва вазифаларни бажариш кўникмалари синовдан ўтказилади.
«Тадбирлар КХШТга аъзо давлатларнинг тасдиқланган жанговар тайёргарлик режаларига мувофиқ ўтказилмоқда. «Ўзаро ҳамкорлик — 2026», «Қидирув — 2026» ва «Эшелон — 2026» ўқув машғулотлари мунтазам равишда ва ташкилотга аъзо давлатлар ҳудудларида навбатма-навбат ўтказиб келинади», — дея қўшимча қилинади Мудофаа вазирлиги баёнотида.