Қирғизистонда меҳрибонлик уйлари ўрнига “Она уйлари” ривожлантирилади
У ерда турмуш шароити оғир аёллар болалари билан яшайди. Уларга психологик, тиббий, ижтимоий ва ҳуқуқий ёрдам кўрсатилади.
Қирғизистонда меҳрибонлик уйлари ўрнига “Она уйлари” кенгайтирилади
Қирғизистонда меҳрибонлик уйлари тизимини босқичма-босқич қайта кўриб чиқиш ва оғир аҳволдаги оналар фарзандлари билан бирга яшаши учун кичик масканлар тармоғини ривожлантириш зарур. Бу ҳақда Жогорку Кенеш (Парламент) депутати Дастан Бекешев Бишкекдаги “Она уйи”га ташрифидан кейин маълум қилди, дея хабар берди “24.kg”.
Депутатнинг айтишича, пойтахтнинг Октябр туманида шундай муассасалардан иккитаси ишламоқда. У кеча улардан бирига борди. Ҳозир у ерда оғир турмуш шароитидаги саккиз нафар она кичик ёшдаги фарзандлари билан яшаб турибди.
Депутатнинг фикрича, бундай масканлар болани оилада сақлаб қолиш ва унга зарур парваришни таъминлашга ёрдам беради. Унингча, йирик интернатлардаги тарбиячилар болалар учун ота-онанинг ўрнини боса олмайди.
“Бола оиладан ажратилмаслиги керак. Унга кимдир ғамхўрлик қилиши зарур. Тарбиячилар барибир бу вазифани бажара олмайди, улар она бўла олмайди”, деди у.
“Эне ую” (“Она уйи”) ресурс маркази оғир ҳаётий вазиятга тушиб қолган ҳомиладор аёллар ва болали оналарни қўллаб-қувватлашга йўналтирилган. Масканлар чақалоқлардан воз кечишнинг олдини олиш ҳамда болаларни оилада сақлаб қолиш учун психологик, тиббий, ижтимоий ва ҳуқуқий ёрдам кўрсатади. Бишкекда биринчи шундай марказ 2025-йил май ойида, иккинчиси эса 2026-йил феврал ойида очилган.
Дастан Бекешев бу тажрибани миллий миқёсда ривожлантиришни таклиф қилмоқчи. Бироқ у давлат барча харажатларни бирданига ўз зиммасига олиши қийинлигини ҳам тан олди. Шу сабабли бундай муассасаларни ташкил этишга бизнес вакилларини ҳам жалб этиш кераклигини айтди.
Депутат оилаларни қўллаб-қувватлаш учун фақат нафақаларни ошириш етарли эмаслигини алоҳида таъкидлади. Оналар ва болалар ёрдам олиши ҳамда ўзини хавфсиз ҳис қилиши учун тизимли ўзгаришлар зарур.
У бу масалаларни Жогорку Кенеш мажлисларида кўтаришни режалаштирмоқда. Шунингдек, Меҳнат, ижтимоий таъминот ва миграция вазирлигини болаларни парвариш қилиш тизимини ислоҳ қилишда фаолроқ бўлишга чақирди. Вазирлик маълумотига кўра, мамлакатдаги 137 та интернатда 10 мингга яқин бола яшайди. Уларнинг 95 фоизида ота-онаси ёки қонуний вакиллари бор.