Қирғизистонда хорижликларни рўйхатдан ўтказиш қоидалари янгиланди. Ўзбекистонликлар учун нима ўзгаради?

Қирғизистонда хорижий фуқароларни рўйхатдан ўтказиш тартиби янгиланди. Бу ўзбекистонликларга қандай таъсир қилади?

Қирғизистонда хорижий фуқаролар ва фуқаролиги бўлмаган шахсларни рўйхатдан ўтказиш бўйича янги тартиб тасдиқланди. Ушбу ўзгариш Ўзбекистон фуқароларининг мамлакатда бўлиш қоидаларига ҳам тааллуқли.

Қирғизистон Вазирлар Маҳкамаси фуқаролари белгиланган муддат ичида рўйхатдан ўтишдан озод этиладиган 92 та давлат рўйхатини маъқуллади. Янги тартибга кўра, Ўзбекистон фуқаролари ҳеч қандай қўшимча ҳужжат расмийлаштирмасдан, визасиз режимда ҳар 120 кунлик (4 ойлик) давр ичида жами 60 кунгача Қирғизистонда бўлиши мумкин. Илгари ҳам ўзбекистонликлар учун шу муддат амал қилган, бироқ уни чегарадан чиқиб, қайта кириш орқали янгилаб туриш мумкин эди.

Евросиё иқтисодий иттифоқи (ЁИИ)га аъзо давлатлар — Арманистон, Беларус, Қозоғистон ва Россия — фуқаролари Қирғизистонга кирган кундан бошлаб ҳар 180 кунлик давр ичида жами 90 кунгача қолиши мумкин. Худди шу муддат Сербия, Туркия, Украина, Мўғулистон ва Молдова фуқароларига ҳам тегишли.

Саудия Арабистони, БАА, Қатар, Кувайт, Уммон ва Баҳрайн фуқароларига ҳар 360 кунлик даврда жами 180 кунгача визасиз қолиш имконияти берилган. Муддат аниқ кўрсатилмаган давлатлар учун эса ўзаролик принсипи қўлланади.

Қирғизистон фуқаросининг хорижлик турмуш ўртоғи ёки вояга етмаган фарзандлари мамлакатда бўлиш муддатини ўтказиб юборса, қариндошлик алоқаларини тасдиқловчи ҳужжатни тақдим этган ҳолда ҳуқуқий мақомини қонунийлаштириш учун Қирғизистонга 1 марта кириш ҳуқуқига эга бўлади. Улар киргач, 30 иш куни ичида ҳужжатларини расмийлаштириши керак.

Чет элликлар ва фуқаролиги бўлмаган шахсларни рўйхатга олиш жараёни Ташқи миграцияни ҳисобга олиш ягона тизими (ЭСУВМ) орқали амалга оширилади. Ҳужжатларни офлайн, онлайн ёки махсус мобил илова орқали расмийлаштириш мумкин. Рўйхатдан ўтаётган шахснинг Қирғизистон фуқароси эмаслиги ҳам айнан ЭСУВМ тизими орқали текширилади. Агар хорижий фуқаро бир нечта давлат фуқаролигига эга бўлса, у Қирғизистонга кириб келган чет эл паспорти маълумотлари асосида рўйхатга олинади.

Янги тартиб турар жойларда рўйхатдан ўтиши мумкин бўлган чет элликлар сонига қатъий чекловлар киритади. Эндиликда уй ёки квартирада рўйхатга олинадиган хорижликлар сони ҳар бир кишига камида 12 квадрат метр яшаш майдони тўғри келиши шарти асосида белгиланади. Бундан ташқари, битта турар жойда рўйхатда турган хорижликларнинг умумий сони 10 кишидан ошмаслиги керак. Бироқ яқин қариндошлар бундан мустасно.

2025-йил 31-декабрдан айрим давлатлар фуқаролари учун 60 кунгача бир томонлама визасиз режимни назарда тутувчи қонун ўз кучини йўқотган. Янги қоидалар тегишли мамлакатлар фуқаролари учун Қирғизистонда бўлиш муддатларини мувофиқлаштириш ва қисқартиришни кўзда тутади.

Ҳукумат бу янгилик давлат органлари ўртасида маълумот алмашинувини автоматлаштириш, инсон омили ҳамда коррупсия хавфини камайтириш ва жараённи соддалаштиришга хизмат қилишини таъкидламоқда.

Маълумот учун, Ўзбекистон ва Қирғизистон икки мамлакат фуқароларини чегарадан ўтгандан сўнг 15 кун давомида мажбурий рўйхатдан ўтишдан озод қилишга келишиб олган. Ўзбекистонликлар энг кўп ташриф буюрган сайёҳлик йўналишлари орасида Қирғизистон етакчилик қилмоқда. Ярим йил ичида қўшни республикага 1 981 542 нафар фуқаро туристик мақсадларда борган.