Қибрайдаги икки контейнердан 7 килограмм марихуана ва пневматик қурол топилди
Тошкент вилояти Қибрай туманида қишлоқ хўжалиги мақсадларида фойдаланиш учун ижарага берилган ер майдони четидаги икки контейнердан 7 килограмм марихуана, пневматик қурол ва уч дона патрон аниқланди. Ҳолат юзасидан терговга қадар текширув олиб борилмоқда.
Қибрайдаги икки контейнердан 7 килограмм марихуана ва пневматик қурол аниқланди
Тезкор тадбир Давлат хавфсизлик хизматининг Тошкент шаҳар бўйича бошқармаси ҳамда пойтахт Ички ишлар бош бошқармаси ходимлари ҳамкорлигида амалга оширилган.
Хабарга кўра, ер майдони Қибрай туманида яшовчи, 1986-йилда туғилган, муқаддам судланган фуқарога узоқ муддатли ижарага берилган. Унинг четида жойлашган иккита контейнер холислар иштирокида кўздан кечирилган.
Текширув давомида қуруқ ҳолатда сақланаётган жами 7 килограмм марихуана, ИЖ-38 русумли пневматик қурол ҳамда хабарда 12 миллиметр калибрли деб кўрсатилган уч дона патрон ашёвий далил сифатида олинган.