Қаҳрамонжон Олимов Anorbank кузатув кенгашидан чиқиш тўғрисида ариза берди
Anorbank акциядори, аввалроқ халқаро қидирувга берилган Қаҳрамонжон Олимов банк кузатув кенгаши таркибидан чиқиш тўғрисида ариза берди. Акциядорлар, шунингдек, капитални мустаҳкамлаш учун банкнинг 100 млрд сўмлик қўшимча акцияларини чиқаришни маъқулладилар.
Қаҳрамонжон Олимов Anorbank кузатув кенгашидан чиқиш тўғрисида ариза берди
Anorbank акциядори Қаҳрамонжон Олимов 2 октябрь куни банк кузатув кенгашидан чиқиш тўғрисида ариза юборди, деб хабар берди молиявий ташкилот матбуот хизмати. Бу масала 28 октябрь куни бўлиб ўтадиган акциядорларнинг умумий йиғилишида кўриб чиқилади.
Бундан ташқари, 5 октябрдаги йиғилишда акциядорлар 100 млрд сўмлик қўшимча акциялар чиқарилишини тасдиқладилар.
Шу тариқа банк инвестицияларни жалб қилиш ва капитални мустаҳкамлашни, шунингдек, аввалроқ рейтингнинг пасайишига олиб келган омилларни бартараф этишни режалаштирмоқда.
«Капиталлаштириш режасининг бажарилиши эндиликда алоҳида акциядор билан боғлиқ ҳолатларга қарам бўлмаслиги керак», — дейилади хабарда.
Матбуот хизмати маълумотларига кўра, ҳозирда Anorbank акциялар чиқариш учун зарур бўлган қонунчилик ва корпоратив тартиб-таомиллардан ўтмоқда.
Anorbank одатдаги тартибда ишлашда давом этаётганини, мижозлар олдидаги мажбуриятларини бажараётганини ва асосий банк хизматлари фаолиятини таъминлаётганини маълум қилди.
Fitch Ratings 8 октябрь куни Anorbank рейтингини CCC+ дан CCC гача пасайтирди ва бу қарорни Қаҳрамонжон Олимов билан боғлиқ вазият туфайли капитални тўлдириш атрофидаги ноаниқлик билан изоҳлади.
Аввалроқ Интерпол сайтида Қаҳрамонжон Олимовнинг «қизил билдиришнома» — экстрадиция қилиш масаласини ҳал этиш учун уни қидириш ва вақтинчалик ҳибсга олиш тўғрисидаги сўровномаси бўлган карточкаси эълон қилинган эди. Бунда карточкада айблов ва сўров юборган давлат кўрсатилмаган эди.
Марказий банк ўшанда ҳам Anorbank одатдаги тартибда ишлаётгани ва мижозлар олдидаги мажбуриятларини бажараётганини маълум қилганди.
Корхона ва ташкилотларнинг ягона давлат регистрининг аввалроқ эълон қилинган маълумотларига кўра, Олимовга Anorbank акцияларининг 49,4 фоизи, Нидерландиянинг Bekamin B.V. компаниясига — 50 фоизи, Kapital Sug’urta суғурта компаниясига — 0,6 фоизи тегишли бўлган.