Путиннинг уруш учун яна икки йилга етадиган ресурслари бор - Украина разведкаси
Россия иқтисодий жиҳатдан заифлашганига қарамай, Владимир Путин 2027–2028-йилларда ҳам Украинага қарши урушни давом эттириш учун етарли ресурсларга эга. Бу ҳақда Украина ҳарбий разведкаси раҳбари Олег Иващенко маълум қилди.
Путиннинг урушни давом эттириш учун яна икки йилга етадиган ресурслари бор — Украина разведкаси
Россия Украинага қарши уруш давомида иқтисодий жиҳатдан заифлашган бўлса-да, Владимир Путиннинг 2027 ва 2028-йилларда жанговар ҳаракатларни давом эттириш учун ресурслари етарли, деди Украина Мудофаа вазирлиги Бош разведка бошқармаси (ГУР) раҳбари Олег Иващенко.
«Россияда бу ресурслар қолмаслиги учун ҳамкорлар билан биргаликда ишлаш зарур. Санксиялар амалда ишлаши керак», — деди у.
Шу билан бирга, унинг айтишича, россияликларнинг 60 фоиздан ортиғи аллақачон урушга қарши чиқмоқда.
«Норозилик ўсиб боради. Бу иқтисодий аҳвол ва душманнинг катта талафотлари оқибатидир», — деб изоҳ берди ГУР раҳбари. У, шунингдек, шартнома асосида хизмат қилувчиларни жалб қилиш ҳисобига армияни тўлдириш модели ўзини оқламагани, чунки ҳудудий бюджетлар кўнгиллиларга тўловларни молиялаштиришда давом эта олмаслигини таъкидлади.
«Шу билан бирга, Россия қўшинларининг йўқотишлари ортмоқда. Россиянинг бир кундаги ўртача талафоти 1200 дан 1400 нафаргача, баъзан эса 1500 нафар кишини ташкил этади. Гап ҳалок бўлганлар ва оғир ярадорлар ҳақида кетмоқда», — деди Иващенко.
Июн ойида Украина президенти Володимир Зеленский Путинга очиқ хат йўллаб, унда Москванинг урушни яна икки йилга чўзиш нияти тўғрисида разведка маълумотлари борлигини баён қилган эди. Унинг таъкидлашича, Украина дронлари ва ракеталари ҳужумларига, бензин танқислигига, нархлар ўсишига ва доимий тақиқларга дуч келаётган россияликлар ҳарбий можародан тобора норози бўлмоқда.
«Уларга урушингизнинг охири кўринмаётгани ёқмаяпти», — деб таъкидлаган Зеленский ва Россия президентини урушни тўхтатишга чақирган. Кейинроқ Украина президенти Путин сафарбарлик доирасида фронтга яна «300 мингдан 500 минггача одам» юбормоқчи эканини, чунки Россия Мудофаа вазирлиги етарли миқдорда шартнома асосидаги аскарларни жалб қила олмаётганини айтган.
5-сентабр куни Трампнинг махсус элчилари Стивен Уиткофф ва Жаред Кушнер Путин билан музокаралар ўтказиш учун Москвага борди. Эртаси куни улар Киевга ташриф буюриб, Зеленский билан учрашди. Манбаларга кўра, Трамп элчилари янги ғояларни олиб келмаган ва фақат аввалги таклифларни қайта жонлантиришга уринган.
Нашр суҳбатдошларининг таъкидлашича, Путин ҳамон Донбасс устидан тўлиқ назоратни талаб қилмоқда ва урушни фақат ўз шартлари билан тугатишга тайёр. Шу билан бирга, у Россия армияси йил охиригача Донецк вилоятининг қолган 20 фоизини эгаллаб олишига ишонади. Ўз навбатида, Зеленский аввалгидек ҳудудларни Россияга беришни истисно қилмоқда ва Донбасс масаласини бутун уруш учун ҳал қилувчи аҳамиятга эга деб ҳисоблайди.