«Путинга совға»: АҚШнинг 12 сенатори Трампни дизел келишувини бекор қилишга чақирди
АҚШда олти нафар демократ ва олти нафар республикачи сенатор Доналд Трампни Россия билан дизел ёнилғиси бўйича келишувдан воз кечишга чақирди. Уларнинг фикрича, келишув америкаликлар учун ёнилғи нархларини сезиларли арзонлаштирмайди, аммо Кремлга Украинадаги урушни давом эттириш учун қўшимча маблағ беради.
«Путинга совға»: АҚШнинг 12 сенатори Трампни дизел келишувини бекор қилишга чақирди
ДВ хабарига кўра, Ричард Блюментал бощилигидаги сенаторлар 13-октабр куни АҚШ президентига шу мазмундаги мактуб юборган.
Мурожаатда Конгресс ҳамда Америка халқи Украинадаги урушнинг тугашини қўллаб-қувватлаши, бироқ тинчлик адолатли шартлар асосида ўрнатилиши кераклиги қайд этилган.
Сенаторлар Россия дизел экспортига нисбатан АҚШ санксияларининг бекор қилиниши Путиннинг ҳарбий тизимини қўшимча маблағ билан таъминлаши ва Украина тинч аҳолисига ҳужумларни давом эттириш имконини беришини айтган.
«Бу келишув рақибимизга совға ва иттифоқчиларимизга нисбатан хиёнатдир. У бекор қилиниши керак», - дейилади мактубда.
Мурожаат муаллифлари фикрича, ёнилғи қимматлигидан қийналаётган америкалик оилалар Россия дизелининг жаҳон бозорига қайтиши натижасида сезиларли енгиллик сезмайди.
Шу боис улар Трампни Россияга ҳамда унинг урушни давом эттиришига ёрдам бераётган давлатларга, хусусан, Хитойга иқтисодий босимни кучайтиришга чақирган. Сенаторлар бунинг учун Россия ва Эронга қарши санксиялар тўғрисидаги қонун берган ваколатлардан фойдаланишни сўраган.
Мактубни демократлар Ричард Блюментал, Жин Шоҳин, Ричард Дурбин, Шелдон Уайтхаус, Жек Рид ва Кристофер Кунс имзолаган. Уларга республикачилар Митч Макконнелл, Том Тиллис, Сюзан Коллинз, Алан Стюарт Армстронг, Лиза Мурковски ва Жон Корнин қўшилган.
Мурожаат нусхалари давлат котиби Марко Рубио ва молия вазири Скотт Бессентга ҳам юборилган.
Трамп 9-октабр куни Владимир Путин билан телефон мулоқотидан сўнг Россия дизел ёнилғисини Америка ва жаҳон бозорларига етказиб бериш бўйича келишувга эришилганини эълон қилган эди.
Унинг баёнотига кўра, Россия компаниялари аввал 300 минг тоннадан ортиқ, ноябрда яна 500 минг тонна, шундан кейин эса 1 миллион тонна дизел жўнатиши керак. Кейинроқ яна 3 миллион тонна етказиб бериш ҳам тилга олинган, бироқ бу ҳажм учун аниқ муддат кўрсатилмаган.
АҚШ Молия вазирлиги Россия дизелига нисбатан санксиялар амал қилишини 2027-йил апрелигача тўхтатувчи бош лицензия чиқарган.