Россияга қарши «аёвсиз санксиялар» АҚШ Конгрессида маъқулланди
Энди ҳужжат имзолаш учун президент Доналд Трампга юборилади.
Россияга қарши «аёвсиз санксиялар» АҚШ Конгрессида тасдиқланди
АҚШ Конгрессининг Вакиллар палатаси аввалроқ Сенатдан ўтган Россияга қарши «дўзах санксиялари» ҳақидаги қонун лойиҳасини маъқуллади. Энди ҳужжат имзолаш учун президент Доналд Трампга юборилади.
Уни деярли барча республикачилар ҳамда 58 нафар демократ қўллаб-қувватлади.
«Линдси Гремнинг Россия ва Эронга қарши 2026-йилги санксиялар тўғрисидаги акти» номли қонун лойиҳаси Россиянинг энергетика ва мудофаа тармоқларига, шунингдек, амалдаги санксияларни четлаб ўтишда фойдаланиладиган танкерларнинг «махфий флоти»га қарши янги чекловларни назарда тутади.
Бундан ташқари, ҳужжат Трампга Хитой, Ҳиндистон ва бошқа давлатлар томонидан Россия нефти ва газини харид қилиш ҳажмини камайтириш мақсадида уларга нисбатан 100 фоизгача божлар жорий этиш ваколатини беради. Қонун лойиҳасига Эронга қарши санксияларни кенгайтириш ҳам киритилган. Ташаббус норасмий равишда «аёвсиз санксиялар» ҳақидаги қонун лойиҳаси деб аталмоқда.
Сенат қонун лойиҳасини август ойида маъқуллаган эди. Овоз беришдан олдин Украина президенти Володимир Зеленский америкалик қонунчилар билан учрашиб, уларни ҳужжатни қўллаб-қувватлашга чақирди ва процессуал овоз беришлардан бирини бевосита Сенат залидан кузатди. Реутерс ҳисоб-китобларига кўра, қонун лойиҳаси Трампнинг Оқ уйга қайтиши ва 2025-йил январида ҳар икки палата республикачилар назоратига ўтганидан кейин Конгресс томонидан қабул қилинган Украина билан боғлиқ энг муҳим ҳужжат бўлди.
Ҳужжатни кўриб чиқиш бир йилдан ортиқ давом этди. Линдси Грем ва бир неча ўнлаб сенаторлар уни 2025-йил апрел ойида киритган эди, бироқ Конгресснинг республикачи раҳбарияти овоз беришни ўтказиш учун Трампнинг розилигини фақат 2026-йил июлида, Грем ўлимидан бир неча кун олдин олди. Шундан сўнг қонун лойиҳасига унинг номи берилди.
Вакиллар палатасидаги демократларнинг катта қисми ҳужжатга қарши чиқди. Уларнинг фикрича, қонун лойиҳаси Трампга божлар жорий этиш, жумладан, АҚШ иттифоқчиларига қарши божлар киритиш учун жуда кенг ваколатлар беради, шу билан бирга, агар президент санксияларни мамлакат миллий манфаатларига зид деб ҳисобласа, уларни қўлламаслик имконини беради. Вакиллар палатасидаги демократлар етакчиси Ҳаким Жеффриснинг айтишича, ушбу истиснолар сабаб Россияга зарар етказиши мумкин бўлган янги санксиялар жорий этилмай қолиши мумкин.