Путин Шавкат Мирзиёевни Мустақиллик байрами билан табриклади
Путин Шавкат Мирзиёевни Мустақиллик байрами билан табриклади
Ўзбекистон Республикаси Мустақиллигининг 35 йиллиги муносабати билан Президент Шавкат Мирзиёевга хорижий давлатлар ва ҳукумат раҳбарларидан самимий табриклар келиб тушмоқда. Жумладан, Россия Федерацияси Президенти Владимир Путин Ўзбекистон раҳбари ва халқига ўзининг эзгу тилакларини йўллади.
Табрик мактубида Ўзбекистоннинг иқтисодий ва ижтимоий ривожланиш йўлида дадил қадамлар билан бораётгани ҳамда жаҳон миқёсида муносиб равишда юқори обрўга эга эканлиги таъкидланган.
"Россия ва Ўзбекистон ўртасидаги муносабатлар стратегик шериклик ва иттифоқчилик характерига эга. Москва ва Тошкент барча асосий йўналишларда самарали ҳамкорликни, халқаро масалаларда эса ўзаро фаол алоқаларни йўлга қўйган. Ишончим комилки, бизнинг биргаликдаги саъй-ҳаракатларимиз Россия ва Ўзбекистоннинг дўстона халқлари манфаатлари йўлида, минтақавий хавфсизлик ва барқарорликни мустаҳкамлаш мақсадида шериклик алоқаларининг барча жабҳаларини янада кенгайтиришни таъминлайди", — дейилади табрик матнида.
Владимир Путин ўз мактубида Шавкат Мирзиёевга мустаҳкам соғлиқ ва муваффақиятлар, Ўзбекистон халқига эса бахт-саодат ва фаровонлик тилаган.
Эслатиб ўтамиз, жорий йилнинг июн ойида Ўзбекистон Президенти амалий ташриф билан Россияда бўлган эди. Икки давлат раҳбарлари иштирокида Ўзбекистондаги биринчи интеграциялашган атом электр стансияси қурилишига старт берилган.