Саида Мирзиёева Ўзбекистон халқини Мустақиллик байрами билан табриклади
Саида Мирзиёева Ўзбекистон халқини Мустақиллик байрами билан табриклади.
Президент Администрацияси раҳбари Саида Мирзиёева Ўзбекистон мустақиллигининг 35 йиллиги муносабати билан халққа табрик йўллади. Табрикда Мустақиллик куни сўнгги йилларда тубдан янгиланиб, изчил ривожланиб бораётган Ўзбекистон учун муҳим сана экани қайд этилди.
Саида Мирзиёева президент Шавкат Мирзиёевнинг байрам тадбиридаги нутқида мамлакат тараққиётининг келгуси ўн йиллиги “Миллий юксалиш даври” деб эълон қилинганини эслатган.
“Олдинда кенг кўламли миллий дастурлар ижроси, катта вазифалар турибди: билим ва кўникмаларни амалий капиталга айлантириш, аҳоли саломатлиги ҳамда узоқ умр кўришини таъминлаш, юқори технологияларга асосланган иқтисодиётни барпо этиш, сув ресурсларини ҳар томонлама тежаш ва атроф-муҳитни асраш, қонун устуворлигини тўлиқ кафолатлаш, маҳалла институтини мустаҳкамлаш ҳамда Ўзбекистоннинг халқаро майдондаги обрў-эътиборини янада юксалтириш шулар жумласидандир. Байраминг муборак бўлсин, жонажон Ўзбекистоним”, дейилади табрикда.
Маълумот учун, 28-август куни Янги Тошкентда президент Шавкат Мирзиёев иштирокида Ўзбекистон Республикаси давлат мустақиллигининг 35 йиллигига бағишланган тантанали маросим бўлиб ўтди. Тадбирда давлат раҳбари 1991-йилда халқнинг хоҳиш-иродаси ва қатъияти билан давлат мустақиллиги қўлга киритилганини таъкидлади. Ватан озодлиги ва миллий истиқлол йўлида жонини фидо қилган жадид боболарнинг ҳуррият ҳақидаги орзу-ниятлари бугун Янги Ўзбекистонда тўлиқ рўёбга чиқаётганини айтди.