Польша Starlink станциясидаги ёнғинни диверсия деб атамоқда, Дания эса Россия таҳдиди кучаяётганидан огоҳлантирмоқда

Польша Старлинк станциясидаги ёнғинни диверсия деб атамоқда, Дания эса Россия таҳдиди кучаяётганидан огоҳлантирмоқда

Польша марказидаги Старлинк сунъий йўлдош станциясида содир бўлган ёнғин қасддан уюштирилган «диверсия ҳаракати» бўлган, деб маълум қилди ҳукумат.

Польша Бош вазири ўринбосари Кшиштоф Гавковскийнинг айтишича, Мазовия воеводалигидаги ёнғин «станцияни ишдан чиқариш... турли муассасалар, жумладан, Украина армияси учун интернетга киришни узиб қўйиш мақсадида қасддан режалаштирилган».

У Польшанинг TVP Info жамоат телерадиокомпаниясига тергов олиб борилаётганини, бироқ «кўплаб белгилар» ушбу ҳодиса Россиянинг «янги ҳужум доктринаси»га мос келишини кўрсатаётганини айтди. Кремль бунга изоҳ бермади.

Шу билан бирга, Дания разведка хизмати янги таҳдидлар баҳосини эълон қилиб, унда Россия яқин ойларда гибрид урушни кучайтириши кутилаётганини билдирди.

Унда ҳужум уюштирилиши «эҳтимолдан жуда йироқ» бўлиб қолаётгани, бироқ Россиянинг НАТО давлатларига қарши чекланган ҳарбий ҳужум уюштириши мумкинлиги бўйича «паст, аммо ўсиб бораётган хавф» борлиги ҳақида огоҳлантирилган.

Сўнгги ҳафталарда НАТОнинг бир нечта Европа аъзолари Россия уларнинг Украинани қўллаб-қувватлашга содиқлигини синаб кўриш учун ҳужумларга тайёргарлик кўраётган бўлиши мумкинлигини айтишди, Москва буни рад этмоқда.

Гибрид уруш ёки гибрид ҳужумлар — бу одатда рақибга босим ўтказиш ва уни беқарорлаштиришга қаратилган ноҳарбий усулларни, масалан, киберҳужумлар, диверсия ёки дезинформацияни тавсифлаш учун ишлатиладиган кенг тушунчалардир.

Бундай ҳужумларни амалга ошириш учун кўпинча воситачилардан фойдаланилади ва Россия, аксини кўрсатувчи далиллар кўпайиб бораётганига қарамай, бунга алоқадорлигини доимо рад этади.

Польша давлатига тегишли сунъий йўлдош станциясидаги ёнғин чоршанба куни кечқурун Вола Кробовскада содир бўлган. У фаолиятини давом эттирмоқда.

Бош вазир ўринбосарининг сўзларига кўра, у интернет-трафикни Польша орқали бошқа мамлакатларга, жумладан Украинага узатади ва Starlink терминаллари орқали алоқани таъминлайдиган SpaceX тизимларидан фойдаланади.

Россия Президенти Владимир Путин Москва НАТО давлатларига ҳужум қилиш ниятида эмаслигини бир неча бор таъкидлаган.

Шу ой бошида Россия Ташқи ишлар вазири Сергей Лавров урушга тайёргарлик ҳақида Европа гапираётганини айтиб, шундай қўшимча қилди: «Агар Европа Россияга ҳужум қилса, бу [Украинадагидан] бутунлай бошқача уруш бўлади ва у жуда қисқа давом этади».

Путин 2022 йилда Украинага кенг кўламли босқинни бошлади ва ҳозирда Москва Украина ҳудудининг қарийб 20 фоизини, жумладан 2014 йилда аннексия қилинган Қрим ярим оролини назорат қилмоқда.

Украинада Харьков ва Киев пайшанба кунига ўтар кечаси Россиянинг энг даҳшатли ҳужумларига учради.

Харьковда Стара Гнилиця қишлоғидаги фермада Россия зарбаси оқибатида олти киши ҳалок бўлди, яна ўн икки киши яраланди, деб хабар берди Украина давлат фавқулодда вазиятлар хизмати.

Унда улар сабзавотларни саралаётган қишлоқ хўжалиги ишчилари бўлгани айтилган, Харьков вилояти раҳбари эса улардан тўрт нафари аёллар эканини қўшимча қилган.

Киевда тунда икки киши ҳалок бўлди, яна саккиз киши яраланди, деб хабар берди фавқулодда вазиятлар хизмати. Шаҳарда 50 дан ортиқ фуқаролик объектлари, жумладан, туғруқхона биноси ҳам шикастланган.

Шифохона директорининг айтишича, ушбу ҳужум пайтида бир аёл бошпанада ўғил болани дунёга келтирган ва у шундай қўшимча қилган: «Ҳатто шундай даҳшатли кечада ҳам ҳаёт давом этмоқда».

Россия Мудофаа вазирлиги Украина мудофаа объектлари, логистика ва телекоммуникация марказлари, шунингдек, ҳарбийлар томонидан фойдаланиладиган кемаларга зарба берганини маълум қилди.

Молдова президенти тўртта Россия дрони унинг ҳаво ҳудудига кириб келганини, улардан камида биттаси портлаганини айтди, Руминия Мудофаа вазирлиги эса битта дрон унинг ҳудудига қулаганини билдирди.

Россиянинг Украинага ҳаво ҳужумлари сўнгги ойларда уриб тушириш қийинроқ бўлган янги реактив дронлар туфайли янада вайронкор тус олди.

Киев уларга қарши тура оладиган арзон қуролларни ишлаб чиқиш устида шошилинч ишламоқда, чунки уларга қарши курашиш учун мўлжалланган ракеталар ва қирувчи самолётлар жуда қимматлик қилади.

Чоршанба куни Нью-Йоркда БМТ Бош Ассамблеясида сўзлаган Украина Президенти Владимир Зеленский «ҳаётни сақлаб қолиш учун бизга баллистик тутиб қолувчи қурилмалар керак» деди ва АҚШни ёрдам беришга чақирди.

У Путиннинг урушни давом эттириши ва «бу ёвузликни янада кенгроқ ёйиши» олдини олиш кераклигини айтиб, шундай қўшимча қилди: «Путин ҳар доим ҳар бир километр ер учун кўпроқ одамни ўлдиришга ёрдам берадиган кимнидир қидиради».

Унинг айтишича, Украина қиш мавсумида Россия энергетика секторини нишонга олишга ҳаракат қилади.

Украина президентининг бу баёнотлари Россия президентининг вакили Кирилл Дмитриев Трамп маъмурияти расмийлари, жумладан Стив Уиткофф ва Жаред Кушнер билан учрашиш учун АҚШга борган пайтга тўғри келди, деб хабар берди Reuters икки манбага таяниб.

Россиялик Лавров чоршанба куни БМТ Хавфсизлик Кенгашида урушда ҳеч қандай танаффус бўлмаслигини айтди.