Россия НАТО ва Полша чегараси яқинида юк машинасини нишонга олди
Россия НАТО ва Полша чегараси яқинида юк машинасини нишонга олди
Россия кучлари Украинанинг Полша билан чегараси яқинидаги юк машинасига зарба берди. Бу ҳақда Полша ва Украина расмийлари маълум қилганини Реутерс ёзди. Ҳодиса Россия НАТОга аъзо давлатлар чегараларига яқин ҳудудларда зарбаларни кучайтираётган бир вақтда юз берди.
Полша чегара хизмати Реутерс агентлигига берган маълумотига кўра, ҳужум Полша ҳудудидан тахминан 800 метр узоқликда, Дороҳуск–Яҳодин чегара ўтказиш пункти яқинида содир бўлган. Зарба ортидан чегара пункти фаолияти қисқа муддатга тўхтатилган, кейин эса яна тикланган.
Россия Мудофаа вазирлиги зарба Украинадаги Европадан келадиган ҳарбий юкларни ташишга хизмат қилувчи инфратузилмага берилганини билдирди. Уруш шароитида Украина савдо ва қурол-яроғ етказиб беришда Полша, Руминия ва Молдова билан чегаралар орқали келадиган таъминотга катта даражада таянади.
Сўнгги ҳафталарда Россия Украинани Ғарбдаги иттифоқчилари билан боғловчи чегара ўтказиш пунктларини нишонга ола бошлади. Бу Москва ва Киев урушнинг тўртинчи йилидан ошган бир пайтда бир-бирининг иқтисодий инфратузилмасига зарбаларни кучайтираётганидан далолат беради.
Россия президенти Владимир Путин БРИКС саммитида қатнашаётган Ҳиндистонда бўлган пайтда Кремл матбуот котиби Дмитрий Песков Ҳиндистон бош вазири Нарендра Моди ва Хитой раиси Си Сзинпин Украина бўйича тинчлик келишувига эришишда воситачилик қилишга ёрдам беришни таклиф қилганини маълум қилди.
Ўтган ой Қирғизистонда бўлиб ўтган саммитда Моди Путинга уруш якунланиши кераклигини айтганди. Россия билан анъанавий равишда яқин муносабатларга эга давлатлар раҳбарларининг Украинадаги урушни тўхтатишга чақириқлари сўнгги вақтларда кўпайган.
Қозоғистон президенти Қосим-Жўмарт Тўқаев ҳам ўтган ой Путинга можаро бўйича амалдаги фронт чизиғида жангларни тўхтатиш кераклигини очиқ айтганди.
Бироқ Россия бундай таклифларни рад этиб келмоқда. Москва Украина Донбаснинг саноатлашган шарқий қисмини Россия назоратига бериш учун ўз қўшинларини ортга қайтариши кераклигини таъкидламоқда. Киев эса бу талабни ҳеч қачон қабул қилмаслигини билдирган.
БРИКС асосчилари бўлган Бразилия ва Хитой ҳам тинчлик музокараларини қайта бошлашга чақирган.
Песковнинг сўзларига кўра, Путин Моди билан Украинадаги фронтдаги вазиятни муҳокама қилган. Шунингдек, у Россия, Украина ва АҚШ иштирокидаги уч томонлама музокараларни октабр ойида қайта бошлаш имкониятини истисно қилмаган.
Россия назоратидаги Украинанинг жануби-шарқий Запорожье вилоятида Россиянинг давлат атом энергетикаси корпорацияси — “Росатом” раҳбари Алексей Лихачёв Украина кучларини Запорожье атом электр стансияси яқинидаги ёқилғи ташувчи юк машиналарига зарба беришда айблади.
Европадаги энг йирик атом электр стансияси бўлган Запорожье АЕС Россия томонидан 2022-йил мартидан бери назорат қилинади. Стансия ҳануз фронт чизиғига яқин ҳудудда жойлашган.