Полша чегараси яқинида кучли портлаш юз берди
Украинанинг Полша билан чегарадош Волин вилоятида, Дорохуск–Ягодин чегара ўтказиш пункти яқинида яна дрон зарбаси қайд этилди. Полша ҳарбийлари маълумотига кўра, реактив двигателли дрон Полша чегарасидан тахминан 4 километр масофада нишонга урилган ёки уриб туширилган. Ҳужум пайтида Полша қирувчи самолётларни ҳавога кўтарди.
Полша чегараси яқинида кучли портлаш қайд этилди
Полша бош вазири Доналд Туск 17-сентабр куни Украина ҳудудида, Полша чегарасига жуда яқин жойда яна бир кучли портлаш юз берганини билдирди.
Унинг айтишича, ҳодиса Дорохуск чегара пункти яқинида содир бўлган ва эҳтимол, ёқилғи қуйиш шохобчаси нишонга олинган.
Туск портлаш жуда кучли бўлганини таъкидлади. Ҳужум сабаб Полша ҳарбий авиацияси қирувчи самолётларни ҳавога кўтарган.
Полша Қуролли кучлари оператив қўмондонлиги маълумотига кўра, гап реактив двигателли учувчисиз учиш аппарати ҳақида кетмоқда. Дрон Украина ҳудудида, Полша–Украина чегарасидан тахминан 4 километр узоқликда нишонга урилган ёки ҳаво ҳужумидан мудофаа воситалари томонидан уриб туширилган бўлиши мумкин.
Украина Давлат чегара хизмати чегара ўтказиш пунктининг ўзи ҳужум оқибатида зарар кўрмаганини маълум қилди.
Ҳужум фонида Полшанинг Люблин ва Карпатости воеводаликлари аҳолиси ҳукумат хавфсизлик марказидан огоҳлантирув хабарларини олган. Люблин ва Жешув аеропортлари эса парвозларни вақтинча тўхтатган.
Ўша куни Полша парламентида чиқиш қилган Доналд Туск разведка маълумотларига таянган ҳолда, Россия Украинага ёрдам кўрсатаётган давлатларга, жумладан Полшага қарши дрон ва ракеталардан фойдаланган ҳолда «гибрид ҳужумлар» режалаштираётган бўлиши мумкинлигини айтди.
Бироқ Туск бу маълумотни айнан қайси разведка хизматлари тақдим этганига аниқлик киритмаган.
Полша бош вазири янги ҳужум 1939-йил 17-сентабрда Совет Иттифоқи Полшага бостириб кирганининг 87 йиллигига тўғри келганига ҳам эътибор қаратди.
Полша мудофаа вазири Владислав Косиняк-Камиш эса Россияни Украинага қарши урушни кучайтиришда айблаб, Москва «тажовузкор ҳаракатларини тўхтатмаётганини» билдирди.
ДВ маълумотига кўра, бу Дорохуск–Ягодин чегара ўтказиш пунктига бевосита яқин ҳудудда бир ҳафта ичида содир бўлган иккинчи шундай зарбадир.