Покистон собиқ бош вазири Имрон Хоннинг синглиси ҳибсга олинди

Покистон собиқ бош вазири Имрон Хоннинг синглиси ҳибсга олинди

Покистоннинг қамоқдаги собиқ бош вазири Имрон Хоннинг синглиси уни қўллаб-қувватлаш мақсадида кейинги ҳафтага режалаштирилган норозилик намойишлари олдидан ҳибсга олинди, деб хабар берди унинг «Покистон Таҳрики Инсоф» (ПТИ) партияси.

ПТИ расмийларининг маълум қилишича, Алима Хонум якшанба куни тушдан кейин шарқий Лоҳур шаҳрида ҳибсга олинган ва бу ҳаракатни «ноқонуний ушлаб туриш» деб атаган. Унинг ўғли онасини озод қилишни талаб қилмоқда.

Лоҳур комиссари ўринбосари томонидан чиқарилган Хонумни ҳибсга олиш тўғрисидаги буйруқда айтилишича, у Имрон Хоннинг тарафдорларини «ижтимоий тармоқлар ва оммавий учрашувлар орқали» сафарбар қилиб келган. Шунингдек, у 30 кун давомида ҳибсда сақланиши кўрсатилган.

Хонум акасининг ҳибсга олинишини кескин танқид қилиб келади ва унинг тарафдорлари ҳамда ОАВ билан мунтазам равишда мулоқот қилади.

Полиция мулозими Хонумнинг ҳибсга олинганини BBC’га тасдиқлади. Буйруқда айтилишича, у Лоҳурдаги «Кот Лахпат» қамоқхонасига юборилади.

Куннинг бошида унинг оиласи у билан «ҳеч қандай алоқа йўқлиги ва қаерда эканлиги ҳақида маълумот йўқлигини» айтган эди.

«Биз ҳукуматдан зудлик билан унинг қаердалигини ошкор қилишни ва хавфсиз қайтишини таъминлашни талаб қиламиз», деб ёзди Хонумнинг ўғли Шаҳрез Хон X ижтимоий тармоғида.

Кўпчилик унинг ҳибсга олинишини 27 сентябрь куни бутун мамлакат бўйлаб ташкил этиладиган норозилик намойишлари билан боғламоқда, ўша куни намойишчилар Покистон пойтахти Исломободга юриш қилишни режалаштирган.

Ҳибсга олиш тўғрисидаги буйруқда айтилишича, Хонум одамларни «тартибсизликлар келтириб чиқаришга» сафарбар қилган ва «жамоатчилик орасида Ҳукуматга қарши номақбул шиорлар айтган/ҳайқирган».

Исломобод кўчалари аллақачон шаҳардаги ҳукумат биноларини ҳимоя қилиш учун тайёрлаб қўйилган юк контейнерлари билан тўсиб қўйилган.

Маҳаллий ОАВ Покистон ички ишлар вазирининг сўзларидан иқтибос келтиришича, намойишлар мамлакатга зарар етказмоқда ва ҳукумат уларни тўхтатиш учун қўлидан келган барча ишни қилади.

Хон 2023 йилдан бери қамоқда сақланмоқда, ўшанда у лавозимда бўлган вақтида олган совғаларини сотишдан тушган пулларни декларация қилмагани учун уч йилга озодликдан маҳрум этилган эди.

Унга нисбатан давлат сирларини ошкор қилишдан тортиб, давлат совғаларини сотишгача бўлган 100 дан ортиқ иш бўйича айбловлар қўйилган — у буларнинг барчасини сиёсий мотивларга эга деб ҳисоблайди.

Ўтган йили крикет юлдузидан сиёсатчига айланган Хон ер коррупцияси иши бўйича 14 йиллик қамоқ жазосига ҳукм қилинди — бу унга берилган энг узоқ муддатли жазодир.

Қамоқда бўлган вақтида унинг соғлиғи ёмонлашган ва ўтган ой Хон текширувдан ўтиш учун шифохонага боришга мажбур бўлган эди.