Покистонда Имрон Хонни қамоқдан касалхонага юбориш ҳақида буйруқ чиқарилди

Покистон Олий суди 18-август куни собиқ бош вазир Имрон Хонни қамоқхонадан шифохонага ўтказиш ҳақида буйруқ берди. Бу қарор унинг партияси ва оиласининг узоқ вақтдан бери Имрон Хоннинг соғлиғи ёмонлашгани сабабли қилган илтимосини қондирди. Бу ҳақда Реутерс хабар берди.

73 ёшли Имрон Хон, крикетчи сифатида машҳур бўлиб, кейинчалик сиёсатга кирган, 2023-йил августидан бери Равалпинди шаҳарчасидаги қамоқхонада сақланмоқда. У бир қатор жиноий ишлар бўйича айбдор деб топилган. Хоннинг ўзи 2022-йилда ҳокимиятдан четлатилганидан сўнг бу айбловларни сиёсий сабабларга кўра уюштирилган деб ҳисоблайди.

2025-йилда унинг ўғиллари отасининг соғлиғи ёмонлашаётганидан бир неча бор хавотир билдирган. Адвокатларининг таъкидлашича, Имрон Хон қамоқхонада ўнг кўзининг кўриш қобилиятини сезиларли даражада йўқотган.

"Биз инсоннинг асосий ҳуқуқларини инобатга олган ҳолда, маҳбуснинг саломатлиги ва хавфсизлигини таъминлаш учун ушбу буйруқни чиқаряпмиз", деди аризани кўриб чиққан уч судядан иборат ҳайъат раҳбари, судя Шоҳид Воҳид.

Суд Имрон Хонни 48 соат ичида пойтахт Исломободдаги Шифа Интернатионал касалхонасига кўчириш ва у ерда 16-сентябргача қолиши ҳақида кўрсатма берди. Бу маълумотни Хоннинг матбуот котиби Наим Ҳайдар Панжутҳа Х тармоғида тасдиқлади.

Шунингдек, суд унинг даволаниши учун тиббий комиссия тузишни буюрди. Комиссия таркибига кардиолог, умумий амалиёт шифокори, кўз шифокори ва Имрон Хоннинг шахсий шифокори киради.

Имрон Хоннинг "Покистон Таҳрики Инсоф" (ПТИ) партияси суд қарорини мамнуният билан қаршилади. Партия бу қарор зудлик билан, тўлиқ ва кечиктирмасдан бажарилиши кераклигини билдирди.

"Зора бу қарор барвақтроқ чиқарилганда эди, шунда унинг кўзи ва умумий саломатлиги бунчалик ёмонлашмас эди", деди ПТИ матбуот котиби Зулфиқор Бухорий.

Шунингдек, партия суд қарорига мувофиқ ўз аъзолари ва Имрон Хоннинг тарафдорларини касалхона атрофида тўпланмасликка чақирди.

Ҳукумат бу суд қарорига ҳеч қандай муносабат билдирмади. Ахборот ва ички ишлар вазирликлари Реутерс агентлигининг сўровларига жавоб қайтармади. Имрон Хон ишончсизлик вотуми орқали ҳокимиятдан кетганидан бери кўплаб айбловларга дуч келган. Улар орасида давлат хазинаси совғалари ва ноқонуний никоҳ бўйича айбловлар бор. Айрим жазо ҳукмлари бекор қилинган ёки ижроси тўхтатилган, апелляциялар эса кўриб чиқилмоқда. У эса ҳар қандай қонунбузарликни рад этмоқда.

Хоннинг 2023-йил май ойида ҳибсга олиниши оммавий эътирозларга сабаб бўлган. Ўшанда юзлаб одамлар давлат биносига ҳужум қилиб, ҳарбий обьектларни вайрон қилган эди. Унинг тарафдорлари шундан бери ҳам уни озод қилишни талаб қилиб бир неча бор кўчаларга чиққан.

Дунёдаги крикет афсоналари, жумладан қўшни ва рақобатчи Ҳиндистон спортчилари ҳам феврал ойида Имрон Хонга яхшироқ муносабатда бўлишни талаб қилган. Улар Хоннинг қамоқхона шароитидан чуқур хавотир билдирган. Ҳукумат эса шафқациз муносабатда бўлиш ҳақидаги айбловларни рад этади.

ПТИ партияси 2018-йилда ҳокимиятга келган ва асосий провинсияларда катта қўллаб-қувватловга эга. Бироқ 2024-йилги сайловлар олдидан партия ўзининг сайлов белгисидан маҳрум қилинган.