Ўйин ичида ўйин: фуқаро “икки босқичли” фирибгарлик схемаси жабрланувчисига айланди
Андижонлик эркак ўз ихтиёри билан банкдан 80 млн сўм кредит расмийлаштириб, ушбу маблағни фирибгарлар айтган картага П2П шаклида ўтказиб берди. Фирибгарлар бунга эришиш учун қопқон ичига қопқон қўйишди: биринчисига тушмаган эркак иккинчи қопқонга илинганини ўзи сезмай қолди.
Ўйин ичида ўйин: фуқаро “икки босқичли” фирибгарлик схемаси қурбонига айланди
Андижонда бир фуқаро “икки босқичли” фирибгарлик схемасининг қурбонига айланди: фирибгарлар алоқа компанияси вакили, банк ходими ва Марказий банк “подполковниги” қиёфасида “ҳужум ва қайта ҳужум” усулидан фойдаланиб, уни 80 млн сўмга алдаб кетган.
“ВИП мижозимизсиз”
Эрталаб Нозим Эгамовга (жабрланувчи исми ўзгартирилган) нотаниш рақамдан қўнғироқ келган. Ким экан, деб ўйлаган Нозим ака яшил тугмани босган. Қўнғироқ қилган одам рус тилида гап бошлаган:
- Ассалому алайкум. Бу Нозим Эгамовми?
- Ҳа.
- Сизни Беелине алоқа компаниясидан безовта қиляпмиз. Сиз бизнинг ВИП мижозимиз экансиз. Бундан буён ҳам компаниямиз хизматидан фойдаланасизми?
- Ҳа.
- У ҳолда шартнома муддатини узайтиришимиз керак бўлади. Қаерда ишлайсиз?.
- Қаерда ишлашимнинг сизларга нима қизиғи бор?
- Биз қаерда ишлашингизни билишимиз керак.
- Ҳеч қаерда ишламайман!
Нозим ака жаҳли чиқиб, ичида пайдо бўлган шубҳа сабаб иш жойини айтмасликка қарор қилган.
- Рақамингиз ўчирилмаслиги учун шартномани узайтиришимиз керак. Ҳозир сизга 5 та рақамдан иборат код боради. Ўша кодни айтасиз.
Нозим ака шу ерда бу киберфирибгарлар эканини англаб, телефоннинг қизил тугмасини босиб суҳбатни тугатган.
Аслида, бу суҳбат фирибгарларнинг “ўлжа”ни асосий қопқонга олиб борувчи ҳаракати, яъни умумий “стратегия”нинг бир қисми эди. Улар “ўлжа” айнан шу нуқтада бу киберфирибгарлик эканини сезишини олдиндан билишган. Уларга айнан шу керак бўлган.
Тушдан кейин иккинчи босқич — “ўлжа”ни асосий қопқонга тушириш ҳаракати бошланган. Нозим акага яна бир нотаниш рақамдан қўнғироқ бўлган.