Ўзбекистоннинг ташқи савдо тақчиллиги тўққиз ойда 13,7 млрд долларга етди
2026-йилнинг январ–сентябр ойларида мамлакатнинг ташқи савдо айланмаси 65,4 миллиард долларни ташкил этди. Экспорт олтин сотувининг кескин қисқариши ҳисобига камайган, импорт эса сезиларли даражада ошган.
Ўзбекистоннинг ташқи савдо тақчиллиги тўққиз ойда 13,7 млрд долларга чиқди
Ўзбекистонда 2026-йилнинг илк тўққиз ойида ташқи савдо айланмаси ўтган йилнинг шу даврига нисбатан 6,3 фоизга, яъни 3,9 миллиард долларга кўпайиб, 65,4 миллиард долларга етди. Бу ҳақда Миллий статистика қўмитасининг 28-октябр куни эълон қилинган ҳисоботида маълум қилинди.
Ҳисоботга кўра, ушбу даврда экспорт 25,8 миллиард долларни ташкил этиб, 2025-йилнинг мос даврига нисбатан 5,5 фоизга пасайган. Импорт эса 15,7 фоизга ошиб, 39,6 миллиард долларга етган. Шу тариқа мамлакат ташқи савдосида 13,7 миллиард долларлик манфий салдо қайд этилган. Ўтган йилнинг айни даврида бу кўрсаткич 6,9 миллиард доллар бўлган.
Шу билан бирга, олтинни ҳисобга олмаганда, товарлар экспорти 31,6 фоизга ўсиб, 13,3 миллиард долларга етган. Номонетар олтин экспорти эса 2025-йилнинг тўққиз ойидаги 9,8 миллиард доллардан 2026-йилда 2,8 миллиард долларгача қисқарган.
Хитой Ўзбекистоннинг энг йирик ташқи савдо ҳамкори бўлиб қолмоқда. Январ–сентябр ойларида икки давлат ўртасидаги савдо айланмаси 15,2 миллиард долларни ташкил этган. Ундан кейинги ўринларда Россия — 10,5 миллиард доллар, Қозоғистон — 4,3 миллиард доллар, Туркия — 2,2 миллиард доллар ва Афғонистон — 1,6 миллиард доллар билан қайд этилган.
Ҳисоботда айтилишича, экспорт таркибида хизматлар ҳажми 9,7 миллиард долларга етиб, ўтган йилга нисбатан 31,1 фоизга ошган. Жумладан, туризм хизматлари экспорти 5,3 миллиард долларни, транспорт хизматлари эса 2,9 миллиард долларни ташкил қилган.
Импорт таркибида энг катта улуш машина ва транспорт ускуналарига тўғри келган — 12,9 миллиард доллар. Бундан ташқари, 5,8 миллиард долларлик саноат товарлари, 4,8 миллиард долларлик кимёвий маҳсулотлар ҳамда 4,2 миллиард долларлик озиқ-овқат маҳсулотлари импорт қилинган.
Миллий статистика қўмитаси 2026-йилнинг январ–июл ойларида Ўзбекистон дунёнинг 200 дан ортиқ мамлакати билан савдо алоқаларини амалга оширганини маълум қилганди. Ўша даврда ҳам Хитой 11,3 миллиард доллар ва Россия 8,1 миллиард доллар билан мамлакатнинг энг йирик ташқи савдо ҳамкорлари бўлган.