Ўзбекистонда ташқи рекламани жойлаштириш тартиби соддалаштирилди
Энди тадбиркорлар ўзлари фойдаланаётган бино ёки иншоотнинг кириш қисмига фирма номи, товар белгиси ва фаолият
Ўзбекистонда ташқи рекламани жойлаштириш тартиби енгиллаштирилди. Эндиликда тадбиркорлар ўзлари фойдаланаётган бино ёки иншоот кириш қисмига фирма номи, товар белгиси ва фаолият тури кўрсатилган пешлавҳани реклама паспортисиз ўрнатиши мумкин.
Бу ҳолат Вазирлар Маҳкамасининг 2026-йил 13-октябрдаги 563-сонли қарорида белгиланган.
Қарорга мувофиқ, тадбиркор эгаллаб турган бинонинг ташқи қисмига жойлаштирилган номи, фаолият тури ва товар белгиси ҳақидаги ахборот ташқи реклама ҳисобланмайди. Шу сабабли бундай пешлавҳалар учун реклама жойи паспортини расмийлаштириш талаб этилмайди.
Шунингдек, юридик шахслар ўз автотранспорт воситаларига товар белгиси, фаолият тури ҳамда маҳсулотлари ёки хизматлари ҳақидаги рекламани соддалаштирилган тартибда жойлаштириши мумкин. Бунинг учун Ягона интерактив давлат хизматлари портали орқали электрон хабарнома юбориш етарли. Реклама жойи паспорти автоматик шакллантирилади ва бунинг учун йиғим олинмайди.
Ташқи реклама обьектларини мажбурий демонтаж қилиш тартиби ҳам янгиланди. Эндиликда демонтаж санаси ва вақти камида икки кун олдин эълон қилиниши, тадбиркорга эса ёзма хабар берилиши шарт. Демонтаж фақат иш кунлари соат 09:00 дан 18:00 гача амалга оширилади.
Бундан ташқари, шаҳарларнинг ташқи рекламага оид «дизайн-код» талаблари жамоатчилик муҳокамасидан сўнггина қабул қилинади ва эълон қилинганидан уч ой ўтиб кучга киради.
Қисқа муддатли рекламалар учун ҳам аниқ чекловлар белгиланди. Қурилиш обьектларидаги реклама қурилиш якунлангунига қадар, байрам ва тадбирларга оид реклама эса 30 кунгача жойлаштирилиши мумкин.
Ташқи рекламаларнинг жойлаштирилиши устидан жамоатчилик назорати «Халқ назорати» электрон портали орқали амалга оширилади.