Ўзбекистонда аҳоли банклардан қанча қарздорлиги маълум бўлди

Ўзбекистонда аҳолининг банкларга қанча қарздор экани маълум қилинди

Ўзбекистон аҳолисининг банклардан олган кредитлари қолдиғи бир йил ичида 18,8 фоизга ошди. Марказий банк қарзларнинг асосий қисми уй харидига йўналтирилаётганини билдирди.

2026-йил 1-август ҳолатига кўра, мамлакатда жисмоний шахсларга ажратилган кредитлар қолдиғи 239,8 триллион сўмга етди. Қарзлар ҳажми бир йил давомида 37,93 триллион сўмга, яъни 18,8 фоизга кўпайган.

Энг катта улуш ипотека кредитларига тўғри келади — 88,14 триллион сўм. Аҳолининг ушбу турдаги қарздорлиги 2025-йилнинг мос даврига нисбатан 14,1 триллион сўмга ёки 19 фоизга ошган.

Таҳлилга кўра, жисмоний шахслар зиммасидаги микрокредитлар қолдиғи 46,74 триллион сўмни ташкил этган. Бундай қарзлар тадбиркор ёки ўзини ўзи банд қилганларга 300 миллион сўмгача берилади. Қолган кредитлар ва уларнинг йиллик қийматдаги ўзгариши қуйидагича:

Микроқарзлар — 51,14 триллион сўм (бир йилда 19,2 фоизга камайган);

Автокредитлар — 40,5 триллион сўм (ўсиш 8,6 фоиз);

Таълим кредитлари — 6,84 триллион сўм (ўсиш 17 фоиз).

Шунингдек, истеъмол кредитлари қолдиғи 508 миллиард сўмни, бошқа турдаги қарздорликлар (кредит карта ва овердрафтлар) эса 5,91 миллиард сўмни ташкил этган.

Марказий банк аввалги таҳлилида банклардан қарз олган аҳоли орасида 29 фоизида биттадан ортиқ кредит борлигини аниқлаган эди.