Ўзбекистон Кубоги. Чоракфиналнинг барча иштирокчилари маълум бўлди
**Ўзбекистон Кубоги. Чоракфиналнинг барча иштирокчилари аниқ бўлди**
Футбол бўйича Ўзбекистон Кубогининг 1/8 финал босқичидаги сўнгги икки учрашув ҳам якунланди.
### “Ғазалкент” — “Қўқон-1912”
Кутилмаган натижаларга бой кечган баҳсда “Ғазалкент” ўз майдонида “Қўқон-1912”ни қабул қилди. Учрашувнинг 7-дақиқасидаёқ Суҳроб Садиржонов ҳисобни очиб, мезбонларни олдинга олиб чиқди — 1:0. Иккинчи бўлимнинг 75-дақиқасида Диёр Тожиев фарқни иккитага етказиб, “Ғазалкент” устунлигини мустаҳкамлади — 2:0. Меҳмонлар 81-дақиқада Силванус Нимели урган гол орқали фарқни қисқартиришга эришган бўлса-да, қолган дақиқаларда мувозанатни тиклай олмади.
Шу тариқа, “Ғазалкент” Ўзбекистон Кубогининг чоракфиналига йўл олди. “Қўқон-1912” эса турнирни нимчоракфиналда якунлади.
**Ўзбекистон Кубоги, 1/8 финал**
“Ғазалкент” — “Қўқон-1912” 2:1
Голлар: 1:0 — Садиржонов (7), 2:0 — Тожиев (75), 2:1 — Нимели (81).
### “ОКМК” — “Хоразм”
Олмалиқда бўлиб ўтган учрашувда “ОКМК” ва “Хоразм” жамоалари ўзаро куч синашди. Драматик кечган баҳснинг 60-дақиқасида бош ҳакам меҳмонлар дарвозаси томон пеналти белгилади ва ундан Сиаваш Ҳақназари унумли фойдаланиб, ҳисобни очди — 1:0. Асосий вақт тугашига оз қолганида, яъни 86-дақиқада Умидбек Султонов ҳисобни 1:1 кўринишига келтирди. Бироқ ҳакам томонидан қўшиб берилган 90+10-дақиқада олмалиқликлар яна бир пеналти ишлашди. Нуқтага яқинлашган Сиаваш Ҳақназари иккинчи голини уриб, жамоасига ғалаба келтирди — 2:1.
**Ўзбекистон Кубоги, 1/8 финал**
“ОКМК” — “Хоразм” 2:1
Голлар: 1:0 — Ҳақназари (60, пеналти), 1:1 — Султонов (86), 2:1 — Ҳақназари (90+10, пеналти).
Шу билан Ўзбекистон Кубогининг 1/8 финал учрашувлари тўлиқ якунланди. Чоракфинал йўлланмасини қўлга киритган 8 та жамоа номи маълум:
“Гулистон”
“Нефтчи”
“Сўгдиёна”
“Навбаҳор”
“Локомотив”
“Андижон”
“ОКМК”
“Ғазалкент”
Мусобақанинг 1/4 финал босқичига қуръа ташлаш маросими эртага, 16-сентябр куни соат 11:00 да ўтказилади.