Осмонга қайтаришдан кўра қисмларга ажратиш фойдалироқ. Air Samarkand компаниясининг Airbus A330 борти утилизацияга юборилди. Видео
Осмонга қайтаришдан кўра, қисмларга ажратиш фойдалироқ бўлиб чиқди. Air Samarkand авиакомпаниясининг Airbus A330 самолёти утилизацияга юборилди. Видео
Air Samarkand авиакомпаниясининг собиқ кенг фюзеляжли Airbus A330 самолёти Истанбулда утилизация қилинди. Лайнерни таъмирлаб, қайтадан фойдаланишга топширишдан кўра, эҳтиёт қисмларга ажратиш фойдалироқ экани маълум бўлди.
Эндиликда Air Samarkand’нинг ягона кенг фюзеляжли самолётидан фақат деталлар қолди. 2010 йилда ишлаб чиқарилган лайнер Истанбул аэропортида қисмларга ажратилди: уни тиклаш қимматбаҳо бутловчи қисмларини сотишдан кўра камроқ фойда келтириши аниқланди.
Air Samarkand 2026 йил баҳорида парвозларни тўхтатган эди. A330 самолётининг ўзи охирги марта 2025 йилнинг май ойида ишлатилган, шундан сўнг у C-Check техник хизмати кўрсатилиши учун Истанбулга юборилганди. Кейинчалик авиакомпания Самарқанддан амалга ошириладиган йўналишларда ундан фойдаланиш тижорат нуқтаи назаридан мақсадга мувофиқ эмаслиги сабабли, самолётни Хитойнинг Minsheng Financial Leasing лизинг берувчисига қайтаришга қарор қилди.
Бироқ, якунда лайнерни сафга қайтармасликка қарор қилинди. Илгари Ўзбекистон рўйхатидан ўтган UK33001 рақамли самолёт ҳисобдан чиқарилди ва утилизацияга юборилди.
Бунга иқтисодий омил сабаб бўлди: таъмирлаш ва оғир техник хизмат кўрсатиш катта харажатларни талаб қиларди, CF6-80E1 двигателлари ва бошқа қимматбаҳо бутловчи қисмларни алоҳида-алоҳида сотиш эса фойдалироқ бўлиб чиқди.
Эълон қилинган кадрларда лайнер Истанбул аэропорти ҳудудининг ўзида қисмларга ажратилаётганини кўриш мумкин. Фюзеляждан айрим элементлар аллақачон ажратиб олинган, ички конструкциялар очилган, самолётнинг бурун ва дум қисмлари кўриниб турибди.
Глобал ҳаво кемалари тақчиллиги шароитида 16 ёшли самолётни утилизация қилиш қарори кескин туюлиши мумкин. Аммо бугунги кунда эҳтиёт қисмлар бозори эски лайнерларни тиклашдан кўра кўпроқ даромад келтирмоқда.
2025 йил кузида Air Samarkand авиаташувчиси ходимларининг иш ҳақини уч ойга кечиктирган эди.
Кейинчалик иш ҳақи кечикиши билан боғлиқ вазият Меҳнат вазирлиги томонидан назоратга олинди.