Оскар мукофоти совриндори, актриса Эва Мари Сейнт 102 ёшида вафот этди

Оскар мукофоти совриндори, актриса Эва Мари Сент 102 ёшида вафот этди

«Портда» (On the Waterfront) ва «Шимолдан шимол-ғарбга» (North by Northwest) каби Голливуд классикасига айланган фильмлардаги роллари билан танилган, Оскар мукофоти совриндори, актриса Эва Мари Сент 102 ёшида вафот этди.

Сент режиссёр Элиа Казаннинг 1954 йилда суратга олинган «Портда» криминал драмасидаги дебют роли учун «Энг яхши иккинчи даражали актриса» номинациясида Оскар мукофотини қўлга киритган эди. У ушбу фильмда Марлон Брандо ижро этган, ички зиддиятларга тўла собиқ боксчи ва порт ишчисининг севгилиси Иди Дойл ролини ўйнаган.

Беш йил ўтгач, у Альфред Хичкокнинг «Шимолдан шимол-ғарбга» шпионлик триллерида Кэри Грант ижро этган реклама агентлиги раҳбарини хавфли тарзда йўлдан оздирувчи «жозибадор қотил аёл» (femme fatale) Ив Кендалл ролида намоён бўлди.

Оила вакили Жефф Сандерсон унинг сешанба куни Лос-Анжелесдаги уйида, оиласи ва яқинлари даврасида табиий сабабларга кўра вафот этганини тасдиқлади.

Вафотига қадар Сент ҳаёт бўлган энг кекса Оскар совриндори ва Голливуднинг олтин давридан қолган сўнгги юлдузлардан бири эди.

У шунингдек, 1900 йилда «Биз каби одамлар» (People Like Us) номли машҳур телесериалда бой бева аёл ролини ижро этгани учун «Эмми» мукофотига сазовор бўлган.

1924 йилда Нью-Жерси штатининг Ньюарк шаҳрида туғилган Сент театрга бўлган қизиқишини кашф этишдан олдин ўқитувчи бўлишни режалаштирган эди.

У Нью-Йоркда Герберт Бергхоф студиясида, сўнгра Казан томонидан ҳаммуассисликда ташкил этилган, актёрлик маҳорати мактаби ҳисобланган Актёрлик студиясида таҳсил олди.

Сент Казаннинг классик «Портда» фильмидаги ижроси билан Голливудга шиддат билан кириб келди.

Брандо ўзининг кучли актёрлик маҳорати билан танилган эди ва Сент уни «ёқимтой», аммо «бироз қўрқинчли» деб билганини айтганди.

«У менинг ичимни худди яққол кўриб тургандек ҳис қилардим», — деган эди у 2013 йилда Turner Classic Movies (TCM) телеканалига берган интервьюсида.

Шунга қарамай, у Хичкокнинг «Шимолдан шимол-ғарбга» шодеврида ўша пайтда «Хичкокнинг сариқ сочли гўзаллари» деб аталадиган қаҳрамонлардан бирини ўйнаш учун кутилмаган танлов сифатида кўрилган.

Унинг шериги Грант бош ролдаги актрисаларга нисбатан жуда талабчанлиги билан машҳур эди.

«У мен билан ташқи кўринишдан бошлаб ишлади», — деган эди Сент.

«Сочим, пардозим, пойабзалим, тақинчоқларим, ҳамёним, қўлқопларим — ҳамма нарса. Ва мен учун айнан шу ташқи кўринишни яратиш орқали у менга шпион аёл ҳиссини берди».

Сент шунингдек, 1960 йилда Отто Премингернинг «Чиқиш» (Exodus) фильмида Пол Ньюман билан бирга суратга тушган ва Жон Франкенхаймернинг «Ҳамма йиқилади» (All Fall Down) фильмида Уоррен Битти қаҳрамонининг севгилиси ролини ўйнаган.

Кейинчалик у режиссёр Жеффри Хайден билан оила қуриш ва фарзанд тарбиялаш учун диққат марказидан узоқлашди.

Ярим аср ўтгач, 80 ёшлар атрофида бўлган Сент 2006 йилда суратга олинган «Суперменнинг қайтиши» (Superman Returns) блокбастерида Суперменнинг асраб олган онаси сифатида катта экранга қайтди.

Кейинчалик у Колин Фаррелл ва Рассел Кроу билан бирга «Қиш эртаги» (Winter's Tale) фантастик фильмида ва 2019 йилда суратга олинган «Мариетта экстазда» (Mariette in Ecstasy) драмасида роҳиба ролида кўриниш берди.

Голливуднинг «Шон-шараф аллеяси»да иккита юлдузга эга бўлган Сент актёрлик соҳасидаги узоқ йиллик фаолияти унинг ижодига чуқурроқ маъно бағишлаганини айтганди.

«Қанча узоқ яшасанг, шунчалик ақлли бўласан, чунки кўп нарсани кўрасан, кўп жойларда бўласан», — деган эди у TCM телеканалига.

«Ўз ҳаётингда турли хил ҳиссий кечинмаларни бошдан кечирасан ва умид қиламанки, нарсаларни яхшироқ тушунасан.

Ва бу сени яхшироқ актрисага айлантиради».

Сентнинг Хайден билан никоҳи 65 йил — унинг 2016 йилдаги вафотига қадар давом этди. Ундан икки фарзанди қолди.