Оқ уй Трампнинг сиёсати ҳақидаги ўйинларни ишга туширди. Ўйинчиларга мигрантларни тутиш ва чегарада девор қуриш таклиф этилмоқда

Оқ уй ўз сайтида АҚШ президенти Дональд Трамп сиёсати ва у билан боғлиқ воқеаларга бағишланган бешта видеоўйинни жойлаштирди, деб хабар беради. Уларнинг асоси сифатида классик аркада ўйинлари олинган.

Биринчи ўйин — мобил Flappy Bird-га ишора қилувчи Flappy Bill ўйинида ўйинчи панжаларида янги қонун лойиҳасини олиб кетаётган оқ бошли бургутни бошқариши керак.

«Тетрис» асосида яратилган Build the Wall ўйинида фойдаланувчига «чегарани яқинлашиб келаётган тўдадан ҳимоя қилиш» учун тушаётган деталлардан девор қуриш таклиф этилади.

Учинчи ўйин — Rio Run ҳам миграция сиёсатига бағишланган бўлиб, «Илонча» ўйинини такрорлайди. Ўйинчи Техасдаги Рио-Гранде дарёси бўйлаб «чизиқни патрул қилиши» ва депортациялар учун очко тўплаган ҳолда «ҳудуддаги барча чегара бузувчиларни» йиғиши керак. «Патрулчи» белгисида кўк галстукли кекса оқ танли эркак тасвирланган, «қоидабузарлар» эса турли тери рангига эга одамлар сифатида кўрсатилган. «Қоидабузар» қўлга олингандан сўнг, унда тўқ сариқ рангли комбинезон пайдо бўлади — бу АҚШдаги баъзи ҳибсхоналарда қўлга олинган ноқонуний мигрантларга бериладиган кийимга ишорадир.

Supply Line ўйинида ўйинчи мактаб тушлигига тушиб қолмаслиги учун конвейердан бўёқлар ва озиқ-овқат қўшимчалари бўлган маҳсулотларни олиб ташлаши керак. Ўйиннинг шиори — «Американи яна соғлом қилиш».

Сўнгги ўйин — Trump Savings Tycoon-да болаларнинг «Трамп ҳисобварақларини» тўлдириш учун Вашингтондаги Ойнаванд ҳовузга учаётган пул маблағлари ва бриллиантларни тўр билан тутиш талаб этилади. Гап Трампнинг ташаббуси ҳақида бормоқда, унга кўра АҚШ Молия вазирлиги 2025 йилдан 2028 йилгача туғилган барча болаларнинг жамғариб бориладиган инвестиция ҳисобварақларига 1000 доллардан ўтказиб беради.

Ойнаванд ҳовуз тасодифан танланмаган: 2026 йилда Трамп уни реконструкция қилишни бошлаган ва кейинчалик вандалларни сув ҳавзасининг янгиланган қопламасига шикаст етказганликда бир неча бор айблаган эди.