Об-ҳаво, футбол ва солиқлар. Ўзбекистон аҳолиси сўнгги ҳафтада Google тизимидан энг кўп нималарни қидирди

Об-ҳаво, футбол ва солиқлар. Ўзбекистон аҳолиси охирги ҳафтада Google тизимидан энг кўп нималарни қидирди

Об-ҳаво прогнозини билиш, футболни кузатиш ва солиқ масалаларини ҳал қилиш — айнан шу мавзулар охирги етти кун ичида Ўзбекистон аҳолисини энг кўп қизиқтирди. Google Trends тизимида «погода» (об-ҳаво) сўрови 100 мингдан ортиқ мурожаат билан биринчи ўринни эгаллади, алоҳида мавзулар орасида эса футбол яққол ажралиб турди.

Google Trends маълумотларига кўра, 5 октябрь ҳолатига кўра, бир ҳафта ичида мамлакатда 95 та сўров оммалашган. Об-ҳаво ушбу рўйхатда бир неча бор учрайди: «погода завтра» (эртанги об-ҳаво) сўрови бир неча бор 50 минглик кўрсаткичдан ошган. Фойдаланувчилар Тошкент учун прогнозларни излашган, сўровларни инглиз (weather) ва турк (hava durumu) тилларида киритишган. Рўйхатда алоҳида тарзда «волна похолодания» (совуқ ҳаво тўлқини) ҳам қайд этилган — 2 мингдан ортиқ мурожаат.

Футбол рўйхатда 34 та позицияни эгаллаган. Терма жамоаларнинг тўртта ўйини бўйича сўровларнинг ҳар бири 10 минглик кўрсаткичдан ошган: «Португалия – Норвегия», «Испания – Чехия», «Хорватия – Англия» ва «Дания – Португалия».

Яна олтита учрашув 5 мингдан ортиқ сўров тўплаган: «Аргентина – Буркина-Фасо», «Аргентина – Боливия», «Франция – Италия», «Бельгия – Франция», «Австралия – Бразилия» ва ёшлар терма жамоалари ўртасидаги «Хитой U-23 – Ўзбекистон U-23» учрашуви.

Футболчилар орасида Ўзбекистон аҳолиси Ламин Ямаль, Златан Ибрагимович, Эрлинг Холанд ва Рафиньяни қидиришган.

Иккинчи йирик гуруҳни пул ва маиший хизматлар билан боғлиқ сўровлар ташкил этди. «Налог» (солиқ), «пенсионный фонд» (пенсия жамғармаси) ва «газ» сўровларининг ҳар бири 5 мингдан ортиқ мурожаат тўплаган. Рўйхатда шунингдек, автокредит, банк, пенсия, ишсизлик, ўзини ўзи банд қилиш ва валюта курси ҳам бор.

«День учителя» (Ўқитувчилар куни) 5 мингдан ортиқ, «учитель» (ўқитувчи) эса 2 мингдан ортиқ сўров тўплаган.

Технологик сўровлар орасида иккитаси ажралиб туради. ChatGPT 10 мингдан ортиқ мурожаат тўплаб, об-ҳаво ёки футбол билан боғлиқ бўлмаган ушбу даражадаги ягона сўровга айланди. Gemini AI эса мингдан ортиқ сўров тўплаган.

Бошқа трендлар қаторида — «Анатолий Кашпировский» ва «мясо» (гўшт) (ҳар бири 5 мингдан ортиқ мурожаат), «виза», «свадьба» (тўй), «мотоцикл» ва «арест» (ҳибс) (ҳар бири 1 мингдан ортиқ), «вымогательство» (товламачилик) (500 дан ортиқ) ва «мошенничество» (фирибгарлик) (100 дан ортиқ) бор.