Ўзбекистонда суд қарорисиз одамларни 48 соатдан ортиқ ушлаб туриш ноқонуний деб топилди

Ўзбекистонда одамларни суд қарорисиз 48 соатдан ортиқ ушлаб туриш ноқонуний деб топилди

Ўзбекистон Конституциявий суди шахсни маъмурий тартибда уч суткагача, ҳужжатлари бўлмаган тақдирда эса прокурор санкцияси билан ўн суткагача ушлаб туришга йўл қўядиган нормани Конституцияга зид деб топди. Суд суд қарорисиз ушлаб туриш муддати 48 соатдан ортиқ бўлиши мумкин эмаслигини кўрсатди.

Гап Маъмурий жавобгарлик тўғрисидаги кодекснинг 288-моддаси иккинчи қисми ҳақида бормоқда. Ушбу норма чегара режимини ёки давлат чегараси орқали ўтиш пунктларидаги қоидаларни бузган шахсларга нисбатан қўлланилар эди.

Бу масала 22 сентябрь куни Олий Мажлиснинг Инсон ҳуқуқлари бўйича вакилининг мурожаати асосида кўриб чиқилди. Мурожаатда қайд этилишича, 2025–2026 йилларда фуқаролардан 48 соатдан ортиқ маъмурий ушлаб туриш ҳолатлари бўйича олтита шикоят келиб тушган.

Конституциянинг 27-моддаси шахсни суд қарорисиз 48 соатдан ортиқ ушлаб туришни тақиқлайди. Бироқ низолашилаётган норма чегара режимини бузган шахсни уч суткагача, шахсини тасдиқловчи ҳужжати бўлмаган тақдирда эса прокурор санкцияси билан ўн суткагача ушлаб туришга имкон берарди.

Конституциявий суд амалдаги тартибда ушлаб туриш муддатини 48 соатдан ортиққа узайтириш учун суд қарорини олиш назарда тутилмаганини қайд этди. Шу боис уч ва ўн суткалик муддатлар конституциявий кафолатга зид келган.

Суд прокурорни хабардор қилиш ёки унинг санкцияси шахсни 48 соатдан ортиқ ушлаб туриш учун зарур бўлган суд қарорининг ўрнини боса олмаслигини алоҳида таъкидлади.

Якунда Маъмурий жавобгарлик тўғрисидаги кодекснинг 288-моддаси иккинчи қисми прокурор санкцияси билан уч суткагача ва ўн суткагача ушлаб туришни назарда тутувчи қисми бўйича Конституцияга номувофиқ деб топилди.