Ўзбекистонда пенсияларни электрон ҳамёнга олиш мумкин бўлади
2027 йил апрелидан бошлаб пенсия ва бошқа тўловларни нафақат банк картасига, балки банкнинг мобил иловасидаги электрон ҳамёнга ҳам ўтказиш мумкин бўлади. Шу билан бирга, иш берувчиларга имтиёзли пенсия олиш ҳуқуқини берувчи махсус иш стажи ва меҳнат шароитлари тўғрисидаги маълумотларни электрон тизимда юритиш мажбурияти юкланади.
Ўзбекистонда пенсияларни электрон ҳамёнга олиш мумкин бўлади
2027 йил апрель ойидан бошлаб Ўзбекистонда пенсия тўловларини нафақат банк картасига, балки банкнинг мобил иловасидаги махсус электрон ҳамёнга ҳам олиш имконияти пайдо бўлади. Бу Президентнинг 28 сентябрдаги қарорида кўзда тутилган.
2026 йил 1 ноябрдан бошлаб пенсионерларга банк карталарини очиш хизматлари Face ID биометрик идентификациясини қўллаган ҳолда кўрсатилиши керак.
2027 йил 1 апрелдан бошлаб Марказий банк тижорат банклари билан биргаликда тижорат банкининг ягона ҳисобварағи орқали пенсия тўловларини молиялаштиришнинг янги тартибини жорий этиши лозим.
Пенсия ва бошқа тўловларни банк картасига ёки банкнинг мобил иловасида очилган пенсия электрон ҳамёнига ўтказиш мумкин бўлади.
Бундан ташқари, 2027 йил 1 январдан бошлаб фуқаролар давлат хизматлари марказлари ёки Ягона интерактив давлат хизматлари портали орқали пенсия тўловини нақд шаклга ўтказиш, шунингдек, илгари тўхтатиб қўйилган тўловни қайта тиклаш тўғрисида ариза беришлари мумкин бўлади.
Яна бир янгилик имтиёзли шартларда пенсия олиш ҳуқуқига эга бўлган ходимларга тегишли.
Камбағалликни қисқартириш ва бандлик вазирлигига 2026 йил 1 ноябрга қадар «Ягона миллий меҳнат тизими» идоралараро дастурий-аппарат комплексида иш берувчилар томонидан махсус меҳнат стажи тўғрисидаги маълумотларни юритиш функциясини яратиш топширилди.
Иш берувчилар имтиёзли пенсия олиш ҳуқуқини берувчи иш даврларини, шунингдек, меҳнат шароитлари ва ускуналарнинг шикастланиш хавфи даражаси бўйича иш ўринларини аттестациядан ўтказиш натижаларини электрон шаклда қайд этиб боришлари шарт бўлади.
Бу пенсия тайинлашда махсус стажни тасдиқлашни осонлаштириши ва қоғоз ҳужжатларни тақдим этиш заруратини камайтириши керак.
Алоҳида равишда «Ўзархив» агентлигига 2027 йил 1 апрелга қадар илгари давлат архивларига топширилмаган тугатилган корхона ва ташкилотларнинг ҳужжатларини қабул қилиб олиш топширилди.
Гап, хусусан, иш ҳақи ҳисобланиши китоблари, ишга қабул қилиш ва бўшатиш тўғрисидаги буйруқлар ҳамда меҳнат стажи ва иш ҳақини тасдиқлаш учун зарур бўлиши мумкин бўлган бошқа ҳужжатлар ҳақида бормоқда.
Бундай ҳужжатлар истисно тариқасида бепул қабул қилинади.
«Йўл харитаси»да Пенсия жамғармаси ахборот тизимларини бошқа идоралар базалари билан янада интеграция қилиш ҳам кўзда тутилган. Хусусан, стаж ва иш ҳақи тўғрисидаги архив маълумотларини олишни автоматлаштириш ҳамда давлат органлари билан электрон маълумотлар алмашинувини кенгайтириш режалаштирилган.