Ўзбекистонда гендерга йўналтирилган бюджетлаштириш бўйича қўлланма ишлаб чиқилади
Ўзбекистонда гендерга йўналтирилган бюджетлаштириш бўйича қўлланма тайёрланади
18 сентябрь куни Иқтисодиёт ва молия вазирлигида вазир ўринбосари Аҳадбек Ҳайдаровнинг Осиё тараққиёт банки вакиллари билан учрашуви бўлиб ўтди. Музокараларнинг асосий мавзуси гендерга йўналтирилган бюджетлаштиришни жорий этиш ва ривожлантириш бўлди.
Суҳбат давомида томонлар гендер тенглигини таъминлаш, гендерга йўналтирилган бюджетлаштиришни амалиётга татбиқ этиш, шунингдек, икки томонлама ҳамкорликнинг истиқболли йўналишларини муҳокама қилдилар. Таълим, соғлиқни сақлаш ва ижтимоий ҳимоя соҳаларида гендер ёндашувларини илгари суриш, шунингдек, ушбу йўналишда давлат органлари ходимларининг малакасини ошириш муҳимлиги алоҳида таъкидланди.
Учрашув иштирокчилари давлат хизматчилари учун гендерга йўналтирилган бюджетлаштиришнинг мақсадлари, мазмуни ва тамойилларини тушунарли шаклда тушунтириб берувчи махсус амалий қўлланма ишлаб чиқишни кўриб чиқдилар. Бундан ташқари, кадрларни ўқитишни ташкил этиш ва ушбу йўналишни ривожлантириш бўйича амалий «йўл харитаси»ни тайёрлаш масалалари муҳокама қилинди.
Учрашув якунлари бўйича амалдаги икки йиллик стратегия ва республикада амалга оширилган ишларни ҳисобга олган ҳолда гендерга йўналтирилган бюджетлаштиришни ривожлантириш бўйича келгуси чора-тадбирларни белгилаш, шунингдек, тегишли вазирлик, идоралар ва халқаро ташкилотлар иштирокида ишчи учрашувлар ўтказиш бўйича келишувларга эришилди.