Ўзбекистон Лана Нусейбенинг БМТ бош котиби лавозимига номзодини қўллаб-қувватлади
Ўзбекистон Лана Нусейбенинг БМТ бош котиби лавозимига номзодини қўллаб-қувватлади
Ўзбекистон Бирлашган Араб Эмирликлари давлат вазири, мамлакатнинг БМТдаги собиқ доимий вакили Лана Заки Нусейбенинг ташкилот бош котиби лавозимига номзодини маъқуллади.
Бу ҳақда республика Ташқи ишлар вазирлиги баёнотида айтилади.
ТИВ кучайиб бораётган глобал таҳдидлар фонида ташкилотнинг янги раҳбарини танлаш айниқса муҳим эканини таъкидлади. Идоранинг ҳисоблашича, БМТ бош котиби бой дипломатик тажрибага, юқори профессионалликка ва халқаро муаммоларни ҳал қилиш учун давлатларни бирлаштириш қобилиятига эга бўлиши керак.
Ташкилот бўлажак раҳбарининг асосий вазифалари қаторида баёнотда халқаро тинчлик ва хавфсизликни таъминлаш, шунингдек, барқарор ривожланиш мақсадларига эришиш қайд этилган.
Лана Нусейбе БАЭнинг дипломатик соҳасида 2009 йилдан бери ишлаб келмоқда. У турли йилларда Ташқи ишлар вазирлигининг Стратегик режалаштириш департаментини бошқарган, Эмирликларнинг Афғонистон ва Покистондаги махсус вакили бўлган, шунингдек, мамлакатнинг "Катта йигирматалик" доирасидаги ишига тайёргарлик кўришда иштирок этган.
2013 йил сентябрь ойида Нусейбе БАЭнинг БМТдаги доимий вакили этиб тайинланди. У ушбу лавозимни эгаллаган биринчи аёл бўлди.
2017 йилда дипломат БМТ Бош Ассамблеясининг 72-сессияси вице-президентларидан бири бўлган, шунингдек, "БМТ-аёллар" тузилмасининг Ижроия кенгашини бошқарган.
Дипломатик карьерасини бошлашдан олдин Нусейбе Парижда ЮНЕСКО консультанти ва Форс кўрфази мамлакатлари тадқиқот марказида хавфсизлик ва терроризм бўйича дастур таҳлилчиси бўлиб ишлаган.
2026 йил октябрь ойида БАЭ президенти Муҳаммад бин Заид Ол Наҳаён унинг номзодини БМТ бош котиби лавозимига расман илгари сурди. Нусейбе ваколат муддати якунига етаётган Антониу Гутерришнинг ўрнини эгаллашга даъвогарлик қилмоқда.