Ўзбекистон ЖСТ ишчи гуруҳининг 14-йиғилишига тайёргарлик кўрмоқда
Азизбек Ўрунов ЖШТ вакиллари билан Ўзбекистоннинг ташкилотга аъзо бўлиши бўйича музокаралар боришини ва Ишчи гуруҳнинг навбатдаги йиғилишига тайёргарликни муҳокама қилди.
Ўзбекистон ЖСТ Ишчи гуруҳининг 14-йиғилишига тайёргарлик кўрмоқда
Ўзбекистон ва Жаҳон савдо ташкилоти (ЖСТ) мамлакатнинг ташкилотга аъзо бўлиши бўйича музокараларни якунлаш учун зарур бўлган навбатдаги қадамларни муҳокама қилдилар. Ўзбекистоннинг ЖСТга кириши бўйича Ишчи гуруҳнинг 14-йиғилишига тайёргарлик кўришга алоҳида урғу берилди.
Учрашувни Ўзбекистон Президентининг ЖСТ масалалари бўйича вакили, Озиқ-овқат хавфсизлиги қўмитаси раиси Азизбек Урунов Ишчи гуруҳ раиси Юнг-Ё Чой ва ЖСТ Секретариатининг Аъзо бўлиш масалалари бўйича бўлими директори М. Осикава билан биргаликда ўтказди.
Музокаралар давомида томонлар Ўзбекистоннинг ташкилотга аъзо бўлиш йўлида эришган натижалари, мамлакатда амалга оширилаётган ислоҳотлар, шунингдек, кўп томонлама ва икки томонлама маслаҳатлашувларнинг бўлғуси босқичларини кўриб чиқдилар.
Иштирокчилар ЖСТга аъзо давлатлар билан қолган икки томонлама музокараларни якунлаш ва бозорларга киришнинг ўзаро мақбул шартларини келишиб олиш зарурлигини муҳокама қилдилар. Ўзбекистоннинг мажбуриятлари матнларини узил-кесил келишиб олиш, Ишчи гуруҳ ҳисоботининг тегишли бўлимларини ва якуний ҳужжатларни тайёрлаш ҳам устувор йўналишлар қаторида айтиб ўтилди.
Томонлар кўп томонлама музокаралар жараёни доирасида ҳали ҳал қилиниши керак бўлган масалаларга, шунингдек, белгиланган муддатларда аъзо бўлишни якунлаш учун зарур бўлган тартиб-омилларга алоҳида эътибор қаратдилар.
Ўзбекистоннинг ЖСТга аъзо бўлиши бўйича Ишчи гуруҳнинг аввалги, 13-йиғилиши 2026 йил июль ойида бўлиб ўтган эди. Ташкилотга аъзо давлатлар билан икки томонлама музокаралар якунлари бўйича бозорларга кириш шартлари бўйича ҳам сезиларли натижаларга эришилган эди.
Суҳбатдошлар кейинги йиғилишга пухта тайёргарлик кўриш ва қолган масалаларни конструктив мулоқот орқали ҳал қилиш муҳимлигини таъкидладилар.
Миллий қонунчиликни халқаро савдо қоидаларига мослаштириш ишларнинг йўналишларидан бири бўлиб қолмоқда. Хусусан, гап санитария ва фитосанитария чоралари, озиқ-овқат маҳсулотлари хавфсизлиги, ветеринария ва ўсимликлар карантини ҳақида бормоқда.
Озиқ-овқат хавфсизлиги қўмитаси фаолиятини такомиллаштириш, халқаро стандартларни жорий этиш ва мамлакатнинг экспорт салоҳиятини ошириш ҳам ЖСТга аъзо бўлиш жараёнининг муҳим элементлари сифатида қаралмоқда.
Ташкилотга кириш илгаригидек Ўзбекистон ташқи иқтисодий сиёсатининг устувор йўналишларидан бири ҳисобланади. Бу жараён савдо тартиб-омилларини ислоҳ қилиш, қонунчиликни халқаро савдо қоидаларига мувофиқлаштириш ва миллий ишлаб чиқарувчиларнинг хорижий бозорларга чиқиш имкониятларини кенгайтиришни назарда тутади.