Ўзбекистон Грузиядан ёнғоқ ва цитрус мевалар импортига рухсат берди
Ўзбекистон фитосанитария хавфи таҳлилидан сўнг Грузиядан фундук, бодом ва цитрус меваларни импорт қилишга рухсат берди, деб хабар қилди Қўмита.
Ўзбекистон Грузиядан ёнғоқ ва цитрус меваларни олиб киришга рухсат берди
Фитосанитария хавфи таҳлили натижаларига кўра, Ўзбекистон Грузиядан фундук (ўрмон ёнғоғи), бодом ва цитрус маҳсулотларини импорт қилишга рухсат берди.
Бу ҳақда Ўзбекистон Озиқ-овқат хавфсизлиги қўмитаси раисининг ўсимликлар ҳимояси ва карантини масалалари бўйича ўринбосари Жамшид Уруновнинг Грузия Миллий озиқ-овқат агентлиги раҳбари ўринбосари Зураб Липартия билан онлайн учрашуви чоғида маълум бўлди.
Томонлар икки мамлакат ўртасидаги фитосанитария соҳасидаги ҳамкорликни ривожлантириш, қишлоқ хўжалиги маҳсулотларини ўзаро етказиб бериш учун шароит яратиш ва импорт қилинаётган товарлар хавфсизлигини таъминлаш масалаларини муҳокама қилдилар.
Учрашув аввалида Жамшид Урунов Ўзбекистондаги институционал ислоҳотлар доирасида Озиқ-овқат хавфсизлиги қўмитаси ташкил этилганини таъкидлади. Унинг сўзларига кўра, бу озиқ-овқат хавфсизлиги, фитосанитария ва ветеринария соҳаларидаги асосий вазифаларни ягона давлат бошқаруви ва назорати тизимида бирлаштириш имконини берди.
Грузия томони Ўзбекистон бозорига кенг турдаги қишлоқ хўжалиги маҳсулотларини етказиб беришдан манфаатдор эканини билдирди. Ушбу рўйхатга олма, цитрус мевалар, шафтоли, нектарин, голубика (кўк резавор), фундук, бодом ва бошқа товарлар киради.
Қўмитада қайд этилишича, Ўзбекистонда амалдаги тартиб-таомилларга мувофиқ, қишлоқ хўжалиги маҳсулотларининг янги турларини бозорга олиб кириш учун имкониятлар яратиш бўйича ишлар олиб борилмоқда.
Қўмита мутахассислари томонидан ўтказилган фитосанитария хавфи таҳлили натижаларига кўра, Грузия томонига Ўзбекистонга фундук, бодом ва цитрус маҳсулотларини экспорт қилишга рухсат берилди.
Шу билан бирга, бошқа бир қатор Грузия товарларини олиб кириш масаласи алоҳида кўриб чиқилади. Грузия томони зарур техник маълумотларни тақдим этганидан сўнг, ўзбекистонлик мутахассислар олма, шафтоли, нектарин ва голубика бўйича фитосанитария хавфи таҳлилини ўтказадилар.
Унинг натижаларига кўра, ушбу турдаги маҳсулотларни Ўзбекистонга импорт қилиш учун зарур бўлган талаблар белгиланади.
Бундан ташқари, Грузия томони ўзбекистонлик мутахассислар иштирокида қўшма инспекция ташкил этишга тайёрлигини билдирди.
Ушбу ишлар доирасида Грузияда қишлоқ хўжалиги маҳсулотлари етиштириладиган жойлар ва уларни экспортга тайёрлаш билан шуғулланувчи корхоналарнинг ҳолатини ўрганиш режалаштирилган.
Бундай инспекциялар маҳсулотларнинг фитосанитар ҳолатини, уларни ишлаб чиқариш ва сақлаш жараёнларини, карантин объектлари мавжудлиги ёки йўқлигини, шунингдек, белгиланган фитосанитария талабларига мувофиқлигини бевосита жойида баҳолаш имконини беради.
Ўз навбатида, тегишли фитосанитария сертификати мавжуд бўлган тақдирда, Ўзбекистондан Грузия бозорига қишлоқ хўжалиги маҳсулотларининг барча турларини етказиб бериш имконияти сақланиб қолмоқда.