Ўзбекистон фуқароларни Жанубий Кореяда тайёрлаш ва ишга жойлаштириш бўйича янги дастурни ишга туширади
Президент Ўзбекистон фуқароларини Жанубий Кореяда ўқитиш ва ишга жойлаштириш бўйича янги уч йиллик дастурни эълон қилди. Унинг сўзларига кўра, асосий эътибор касб-ҳунар эгаллашга қаратилади. Бундан ташқари, Кореядаги ўзбекистонликларга давлат ҳисобидан етакчи олий ўқув юртларида олти ойлик қайта тайёрлов курслари таклиф этилади.
Ўзбекистон Жанубий Кореяда фуқароларни тайёрлаш ва ишга жойлаштириш бўйича янги дастурни ишга туширмоқчи
15 сентябрь куни Ўзбекистон Президенти Шавкат Мирзиёев Жанубий Кореяда ишлаётган ва таҳсил олаётган ватандошлар билан учрашувда ушбу мамлакатда Ўзбекистон фуқароларини тайёрлаш ва ишга жойлаштириш бўйича янги уч йиллик дастур ишга туширилишини эълон қилди.
Учрашув Президентнинг Корея Республикасига давлат ташрифи доирасида норасмий муҳитда бўлиб ўтди. Суҳбат давомида таълим, касбий тайёргарлик, ишга жойлаштириш ва ватандошлар тажрибасидан Ўзбекистонни ривожлантириш йўлида фойдаланиш мавзулари кўтарилди.
Мирзиёев таълим ҳамон давлат сиёсатининг асосий устувор йўналишларидан бири бўлиб қолаётганини таъкидлади.
«Кимгадир ёқади, кимгадир ёқмайди, лекин мен бир гапни айтаман: муаллим, муаллим, таълим, таълим, билим, билим», — деди Президент «Ўзбекистон 24» телеканали лавҳасида.
Унинг сўзларига кўра, Ўзбекистон Жанубий Корея билан биргаликда мамлакат фуқароларини ўқитиш ва уларни ишга жойлаштиришни ўз ичига олувчи янги уч йиллик дастурни тайёрлашни режалаштирмоқда.
«Корея билан фарзандларимизни бу ерга ишлаш ва ўқишга олиб келиш бўйича янги уч йиллик дастур ишлаб чиқамиз. Кўриб турганингиздек, биринчи масала — касб-ҳунар», — деди Шавкат Мирзиёев.
Президент олий ўқув юртлари раҳбарлари олдига нафақат академик таълимга, балки талабаларнинг амалий касб-ҳунар эгаллашига ҳам кўпроқ эътибор қаратиш вазифасини қўяётганини таъкидлади.
«Мен ҳатто олийгоҳ ректорларига ҳам топшириқ беряпман: соат учгача дарсингни ўт, соат учдан кейин эса менинг болаларимга касб ўргат. Касби бор одам ҳеч қачон хор бўлмайди», — деди у.
Мирзиёевнинг сўзларига кўра, Корея билан янги ҳамкорлик дастури мавжуд форматлардан фарқ қилади.
«Энг катта масала — Корея билан уч йиллик дастур қиламиз. У мутлақо бошқача бўлади», — деди Президент.
Шавкат Мирзиёев алоҳида тўхталиб, Жанубий Кореядаги Ўзбекистон фуқароларига қўшимча таълим олиш ва янги мутахассисликни эгаллаш имкониятини бериш режалари ҳақида маълум қилди.
Президентнинг сўзларига кўра, бир ой муддатда «Эл-юрт умиди» жамғармаси вакиллари Кореядаги ватандошлар билан учрашишлари керак.
«Сизларга тегишли битта нозик масала бор. Бир ой ичида ҳузурингизга Президент жамғармаси, „Эл-юрт умиди“ жамғармаси вакиллари бориб, ҳаммангиз билан гаплашади», — деди у.
Ўқиш йўналишини ўзгартириш ёки бошқа касб эгаллашни истаганларга Жанубий Кореянинг етакчи университетларидан бирида олти ой давомида таҳсил олиш имкониятини бериш таклиф этилмоқда.
«Агар ҳозир ўқиётган нарсангиздан озгина кўнглингиз тўлмаётган бўлса, улар билан гаплашинг. Мен Корея тажрибаси асосида сизларни янги касбга ўқитиш учун Кореянинг энг яхши университетларига олти ойга юбормоқчиман. Стипендияни ҳам, ўқишни ҳам Президентнинг ўзи тўлаб беради», — деди Шавкат Мирзиёев.
Президент Ўзбекистонга қайтгач, ушбу масала бўйича алоҳида қарор қабул қилмоқчи эканини маълум қилди. Келгусида Корея тажрибаси бошқа мамлакатларга ҳам татбиқ этилиши мумкин.
Бундан ташқари, Ўзбекистонда Жанубий Корея билан ҳамкорликда бешта лойиҳа, жумладан, Kia Sonet Prime автомобилларини ишлаб чиқариш ва Миллий онкология маркази қурилиши бошланди. Ўзбекистон Давлат геология қўмитаси ва Корея Эксимбанки стратегик минералларни қайта ишлаш ва уларни етказиб бериш занжирини шакллантириш бўйича хаб ташкил этиш тўғрисида меморандум имзоладилар.