Ўзбекистон электротехника саноатига янги имтиёзлар ва арзон кредитлардан фойдаланиш имконияти берилади

Ўзбекистон электротехника тармоғига янги имтиёзлар ва арзон кредитлардан фойдаланиш имконияти берилади

Ўзбекистонда электротехника саноатини қўллаб-қувватлашни кучайтиришга қарор қилинди: корхоналарга айланма маблағлар учун йиллик 6 % ставкада кредит олиш имконияти яратилади, фоиз ставкаларини компенсация қилиш кенгайтирилади ва йирик хорижий инвесторларни жалб қилиш учун шароитлар яратилади.

Янги чора-тадбирлар Президент қарори билан тасдиқланди. Асосий қоидалар 1 октябрдан кучга киради.

Тармоқ корхоналарига тижорат банклари орқали айланма маблағларни тўлдириш учун уч ойлик имтиёзли даврни ўз ичига олган ҳолда икки йилгача муддатга кредитлар ажратилади. Битта корхона учун максимал сумма 5 миллион долларни, ставка эса йиллик 6 % ни ташкил этади, шундан 2 фоиз пункти банк маржаси ҳиссасига тўғри келади.

Кредитнинг ярмини, лекин 20 миллиард сўмдан ортиқ бўлмаган қисмини Тадбиркорликни ривожлантириш компанияси кафиллиги қоплаши мумкин. Қолган қисми ликвидли мол-мулк, суғурта полиси, экспорт шартномаси ёки бошқа турдаги таъминот билан таъминланиши мумкин.

Мис сотиб олиш учун алоҳида чора-тадбирлар кўзда тутилган. Биржа орқали мис хомашёси сотиб олинаётганда корхона қийматнинг 25 % ини мустақил равишда тўлайди, қолган 75 % ини эса уч кун ичида «Ўзсаноатэкспорт» тўлаб беради. Кейин корхона ушбу суммани 90 кун ичида қайтариши керак. Кечиктирилган тўлов учун йиллик 6 % ставкада фоизлар ҳисобланади. Бунда битта корхонанинг «Ўзсаноатэкспорт» олдидаги қарздорлиги 3 миллион доллардан ошмаслиги керак.

2026-2028 йилларда давлат электротехника саноатидаги инвестиция лойиҳалари учун олинган кредитлар бўйича фоиз харажатларининг бир қисмини компенсация қилади. Ушбу механизм кредитнинг умумий суммасидан қатъи назар, 20 миллиард сўм эквиваленти доирасидаги кредитларга татбиқ этилади.

Миллий валютадаги кредитлар учун компенсация Марказий банкнинг асосий ставкасидан ошадиган ставка қисмига — 10 фоиз пунктигача миқдорда кўзда тутилган. Валютадаги кредитлар бўйича давлат ставканинг 6 % дан юқори бўлган қисмини, лекин 5 фоиз пунктидан кўп бўлмаган миқдорда компенсация қилади.

Компенсация «2+1» тамойили бўйича берилади: дастлабки икки йилда — белгиланган шартларда, учинчи йилда эса, агар корхонанинг маҳсулот ёки хизматларни реализация қилишдан олган йиллик тушуми ўтган йилга нисбатан камида 15 % га ошган бўлса, сақлаб қолинади.

Чора-тадбирларнинг алоҳида блоки электротехника, электроника ва робототехника соҳаларига йирик халқаро компанияларни жалб қилишга тааллуқлидир. Гап охирги уч йилда Forbes Global 2000 рейтингига ва халқаро етказиб бериш занжирларига кирган ҳамда лойиҳага камида 50 миллион доллар инвестиция киритишга тайёр бўлган инвесторлар ҳақида бормоқда.

Бундай компаниялар учун инвестиция шартномаларида уч йил ичида қўшилган қийматни 40 % дан кўпроққа ошириш ва йиллик фойданинг камида 3 % ини илмий-тадқиқот ва тажриба-конструкторлик ишларига йўналтириш мажбуриятлари мустаҳкамлаб қўйилади.

Махсус иқтисодий зоналарда инвесторларга электр энергияси, газ, сув, оқова сувларни тозалаш иншоотлари ва темир йўл инфратузилмаси уланган тайёр ишлаб чиқариш биноларини тақдим этиш режалаштирилмоқда.

Бундан ташқари, йирик инвесторлар 10 йил муддатга ер солиғи, мол-мулк солиғи ва фойда солиғидан озод қилиниши мумкин.

Шунингдек, Ўзбекистонда 2030 йилга бориб электротехника маҳсулотлари экспортини 5 миллиард долларга етказиш режалаштирилмоқда. Тармоқ ва турдош соҳаларда ишлаб чиқариш ҳажмини 11 миллиард долларга етказиш кўзда тутилган.