Ўзбекистон 2027 йилда ШҲТ бош прокурорлари йиғилишига мезбонлик қилади
Ўзбекистон 2027 йилда Шанхай ҳамкорлик ташкилотига аъзо давлатлар бош прокурорларининг навбатдаги йиғилишига мезбонлик қилади.
Бундай қарор 1 октябрь куни Қозонда бўлиб ўтган ШҲТ давлатлари бош прокурорларининг 24-йиғилиши якунлари бўйича эълон қилинди. Учрашувда ташкилотга аъзо давлатлар назорат органлари раҳбарлари, шунингдек, ШҲТ бош котиби Нурлан Ермекбаев ва ШҲТ Минтақавий аксилтеррор тузилмаси (МАТТ) Ижроия қўмитаси директори Уларбек Шаршеев иштирок этди.
Йиғилишнинг асосий мавзуларидан бири вояга етмаганларни ноқонуний ва деструктив контентдан ҳимоя қилиш бўлди. Томонлар хавфсиз ахборот муҳитини яратиш чора-тадбирларини ишлаб чиқиш учун маълумот ва ҳуқуқни қўллаш тажрибаси билан алмашиш, шунингдек, қўшма тадбирлар ўтказишга келишиб олдилар. Йиғилиш якунлари бўйича тегишли баённома имзоланди.
1 сентябрь куни Бишкекда ШҲТнинг юбилей саммити бўлиб ўтди. Ўзбекистон Президенти Шавкат Мирзиёев ташкилот доирасида, жумладан, саноат, сунъий интеллект, транспорт, энергетика ва сув хавфсизлиги соҳаларида ҳамкорликни ривожлантириш бўйича қатор ташаббусларни илгари сурди.