Ўртоқ олимлар, номзодлик дипломли кретинлар…
Қурултой депутати Исо Масиҳ қозоқ бўлганлиги ҳақидаги маълумотлар тарқалишидан хавотир билдирди
Ўртоқ олимлар, номзодликка эга кретинлар…
Қозоғистонда ҳам, худди Украинадаги каби, кейинги пайтларда жамиятнинг маргинал қисми томонидан иштиёқ билан қабул қилинаётган бемаъни назарияларни илгари сураётган янги тўлқин олимлари сезиларли даражада кўпайди.
Масалан, профессор Қайрат Закирьянов Исо Масиҳ қозоқ бўлганлигини даъво қилиб, «kz-постулат» ва «kz-фактор» деб номланган тушунчаларни таклиф қилди. У худди шу мантиқни Чингизхон, Александр Македонский ва бошқа машҳур тарихий шахсларга ҳам татбиқ этиб, уларнинг барчаси қозоқ бўлганини таъкидламоқда. Ўз навбатида, украиналик тарихчи Валерий Бебик Чингизхоннинг украин илдизларига эга эканлигини даъво қилади.
Қурултой (Қозоғистоннинг янги бир палатали парламенти) депутати Шолпан Каринова ижтимоий тармоқларда Қозоғистон тарихи ҳақида шу каби шубҳали маълумотлар тарқалаётганидан хавотир билдирди.
«Бугунги кунда тарихий онг нафақат дарсликлар ва илмий ишлар орқали шаклланяпти. Ижтимоий тармоқлар ва рақамли платформаларнинг таъсири ортиб бормоқда. Айниқса, ёшлар TikTok, Instagram, YouTube каби платформалар орқали кўплаб маълумотларни олмоқда. Шу боис Қозоғистон тарихи ҳақида қандай маълумотлар тарқатилаётгани, уларнинг манбаси нимада ва улар жамиятга қандай етказилаётгани масаласи тобора муҳим аҳамият касб этмоқда. Афсуски, ижтимоий тармоқларда тарихий мавзулардаги шубҳали ва бузиб кўрсатилган маълумотлар тез тарқалмоқда. Бунга ўз вақтида профессионал жавоб қайтариш ва ишончли маълумотларни тақдим этиш имконини берувчи тизимли механизм зарур», — деди Каринова парламент йиғилишида.
«Шунинг учун ахборот маконидаги рақобат — бу миллий онгга таъсир ўтказиш учун рақобатдир. Шу муносабат билан ҳукуматдан сўраймиз: миллий тарихий онгни давлат ахборот сиёсатининг устувор йўналишларидан бири сифатида белгилашни; Қозоғистон тарихига оид контентнинг илмий асосланганлиги ва ишончлилигини таъминловчи тизимни шакллантиришни; тарихий хотира ва миллий қадриятларни оммалаштирадиган замонавий медиалойиҳаларни қўллаб-қувватлашни; Қозоғистон тарихини TikTok, Instagram, YouTube каби платформаларда замонавий ва тушунарли форматда оммалаштирувчи лойиҳаларни амалга оширишни; тарихга оид ёлғон ва бузиб кўрсатилган маълумотларга тезкор муносабат билдиришнинг самарали механизмини шакллантиришни», — дея қўшимча қилди Каринова.