Ўғриликни тўхтатиш учун СЎ (сунъий интеллект)га мурожаат қилган бурчакдаги дўкон
Дўкондорлар ўғриларни кузатиш ва қўлга олиш учун видеокузатув камералари билан бирга сунъий интеллектдан фойдаланмоқдалар.
Ўғриликни тўхтатиш учун сунъий интеллектга мурожаат қилган маҳаллий дўкон
Дўкон эгалари Камал ва Донна Сингҳнинг айтишича, сунъий интеллектли кузатув камералари потенциал дўкон ўғриларини тутишни анча осонлаштирди
Жанубий Йоркширдаги озиқ-овқат дўкони эгалари дўкон ўғриларини тутиш учун кузатув камералари билан бирга сунъий интеллектдан (СИ) фойдаланаётганликларини айтишмоқда.
Ротеремдаги «One Stop K&D» дўкони ҳаммуассиси Камал Сингҳнинг сўзларига кўра, агар маҳсулотлар чўнтак ёки сумкаларга солинса, ходимларнинг телефонига огоҳлантириш келади ва шундан сўнг кузатув камераси тасвирларини зудлик билан кўриб чиқиш имконияти пайдо бўлади. Зарурат туғилганда, дўкон эшикларини қулфлаб қўйиш мумкин.
«Биз дўкондан чиқиб кетишимиз, дунёнинг нариги чеккасида бўлишимиз ва "дўкон ўғриси" деган огоҳлантиришни олишимиз мумкин», деди Камал.
Корхона маълумотларига кўра, дўконда 32 та кузатув камераси мавжуд ва СИ дастурий таъминоти ойига 300 фунт стерлинг туради.
Брэмлидаги дўкон ҳаммуассиси Донна Сингҳнинг айтишича, бу ўзгариш ўғриликлар сонининг камайишига олиб келди.
У шундай деди: «СИ пайдо бўлгунига қадар, кимдир дўконда ўғрилик қилганини қачон билардингиз?»
«Агар улар шунчаки кириб, ўша ширинлик қутисини олишса-ю, сиз буни кўрмаган бўлсангиз, нигоҳингизни камерадан узганингизда буни пайқамай қолсангиз, у ерда дўкон ўғриси бўлганини қаердан биласиз?»
«СИ билан эса бу сизга дарҳол маълум бўлади».
Дўконда 32 та кузатув камераси бор
Камалнинг айтишича, икки йил олдин дўконни кенгайтиришганда, улар харидорларни кузатиб туриш йўлини хоҳлашган.
«Илгари бизда фақат битта йўлак бор эди, дўконни кассадан туриб кўриш мумкин эди, ҳозир эса у анча катталашган», деди у.
«Шунинг учун мен бу ерга СИни олиб кирдим. Ходимлар ҳам харидорларни кузатиш орқали уларни доимий равишда ноқулай аҳволга солишмайди, чунки камера кузатиб туради — улар [харидорлар] нима қилаётганини аниқ кўра олишади».
Камал Сингҳ дўконда ўғрилик содир этилгани гумон қилинганда телефонига огоҳлантириш олади ва кейин кузатув камераси тасвирларини кўриб чиқиши мумкин
Бизнес учун харажат бўлишига қарамай, Камалнинг айтишича, тизим уларнинг вазиятида сарфланган пулга арзийди.
«Кимдир икки банка кофе олганда, бу бир мартада 16 фунт стерлинг дегани», деди у.
«Уни шимларининг ичига солиб, чиқиб кетишга уринишлари учун 30 сония кифоя қилади».
У қўшимча қилди: «Бу фойдали — кунига 10 фунт стерлинг эвазига у ўз харажатларини қоплайди».
Дўкон эгалари баъзи одамларда кузатув камералари туфайли шахсий ҳаёт дахлсизлиги борасида хавотирлар бўлиши мумкинлигини тан олишди.
«Баъзи одамлар буни "Катта оға" (Big Brother) деб аташлари мумкин», деб тушунтирди у.
«Агар камералар сизни кузатишини хоҳламасангиз, дўконларга келманг».
«Агар сиз дўкон ўғриси бўлмасангиз, хавотирланадиган ҳеч нарсангиз йўқ. Биз бу ерда 24/7 камераларга тикилиб ўтирмаймиз. Камераларни фақат огоҳлантириш келгандагина текширамиз».
Эр-хотин ўғриликка уринган одамлардан шунчалик ғазабда эканликларини, ҳатто кузатув камераларидан олинган баъзи видеоларни ижтимоий тармоқларга жойлаштирганликларини айтишди.
«Бундан қутулиб қола олмаслигингиз ҳақидаги хабар тарқалишини хоҳлайман, биз сизнинг шахсингизни очиқлаб, шарманда қиламиз», дея қўшимча қилди у.
Жанубий Йоркшир полициясига изоҳ олиш учун мурожаат қилинган.