Нурота тоғларида қоятош расмлари ва қадимги манзилгоҳ излари топилди
Нурота тоғларида қоя тош суратлари ва қадимги манзилгоҳ излари топилди
Археологлар Нурота тизмаси тоғларида мезолит ва неолит даврларига тегишли деб тахмин қилинаётган қоя тош суратларини, шунингдек, бронза даврига оид манзилгоҳни топдилар. Ушбу топилмалар Самарқанд вилоятининг Қўшрабод туманида олиб борилган дала тадқиқотлари давомида аниқланди. Улар қадимги одамларнинг ушбу ўлкани қандай ўзлаштиргани ва қўшни қабилалар билан қандай алоқада бўлганини чуқурроқ тушунишга имкон беради.
Октябрь ойида Яҳё Ғуломов номидаги Самарқанд археология институти ходимлари туманнинг тоғ ва тоғ олди ҳудудларини тадқиқ қилдилар. Оқчабсой маҳалласига қарашли Эгрижарсой, Хўжасой (Бадимин), Ғалажинсой ва Сумбулсой ҳудудларидаги тош шийпонларнинг деворлари ва шипларида тадқиқотчилар табиий охра билан чизилган суратларни аниқладилар. Dастлабки баҳолашларга кўра, ушбу тасвирлар мезолит ва неолит даврларига оид бўлиши мумкин.
Яна бир муҳим топилма Пангат маҳалласи ҳудудида аниқланди. Археологлар учта жойда бронза даврига оид сопол парчаларини топдилар ва ўргандилар. Қумолоқли қишлоғидан 700–800 метр шарқда жойлашган майдонлардан бирида мутахассислар 2 га 1 метр ўлчамдаги синов қазиш ишларини ўтказдилар.
Ер остида археологлар қалинлиги 60 сантиметрга яқин бўлган маданий қатламни аниқладилар, бу эса бу ерда бронза даври манзилгоҳи мавжуд бўлганидан далолат беради. Қазишмалар давомида сопол буюмларнинг кўплаб синиқлари ва суяк қолдиқлари топилди.
Топилган материаллар қазиш ишларини давом эттиришни талаб қилади. Улар Нурота тоғларининг қадимги аҳолиси кундалик ҳаёти, турмуш тарзи ва машғулотлари хусусиятлари ҳақида янги маълумотларни бериши мумкин.
Олимлар топилмаларни бошқа ҳудудлардаги археологик материаллар билан солиштиришни режалаштирмоқда. Бу Нуротанинг ўзлаштирилиш тарихини яхшироқ тушунишга ёрдам беради.
Аввалроқ Самарқанд вилоятида археологлар VIII асрга оид ҳукмдорлар саройи бўлиши мумкин бўлган ёдгорликни топган эдилар.