Нижнекамскда дронлар ҳужуми пайтида жабрланган ўзбекистонлик ватанига олиб келинди
10 август куни Россиянинг Нижнекамск шаҳрига учувчисиз учиш аппаратлари ҳужуми пайтида оғир яраланган Ўзбекистон фуқароси ватанига олиб келинди. Парвоз вақтида унга шифокорлар ҳамроҳлик қилди, беморга доимий кислород кўмаги таъминланди.
Нижнекамскда дронлар ҳужуми оқибатида жароҳатланган ўзбекистонлик ватанига қайтарилди
Россиянинг Татаристон республикаси Нижнекамск шаҳрига 10 август куни уюштирилган дронлар ҳужумида оғир жароҳат олган Андижон вилоятилик фуқаро 13 сентябрь куни Ўзбекистонга олиб келинди. Бу ҳақда «Газета»га Миграция агентлиги Тошкент вилояти филиали раҳбари Юсуп Кабулжанов маълум қилди.
Беморни ташиш бўйича қарор унинг аҳволи барқарорлашгани ва россиялик шифокорлар эвакуация қилишга рухсат берганидан кейин қабул қилинди.
Миграция агентлиги, Ўзбекистоннинг дипломатик ваколатхоналари ва Uzbekistan Airways беморни шифохонадан самолётгача ташишни ташкил этди. У бутун йўл давомида кислород аппаратига уланган ҳолда бўлди, парвоз вақтида эса тиббиёт бригадаси ҳамроҳлик қилди.
Ўзбекистонга етиб келгач, бемор кейинги даволаниш ва реабилитация учун ихтисослаштирилган тиббиёт муассасасига юборилди.
Эслатиб ўтамиз, Нижнекамскка дронлар ҳужуми оқибатида қурилиш компаниясида ишлаётган саккиз нафар Ўзбекистон фуқароси ҳалок бўлган эди. Уларнинг жасадлари 12 август куни Мудофаа вазирлиги самолётида ватанига олиб келинганди.
Яна бир неча ўзбекистонлик жароҳатланган. Жабрланганларга тиббий ва ижтимоий ёрдам кўрсатиш, шунингдек, ҳалок бўлганлар ва яраланганларнинг оилаларини ҳар томонлама қўллаб-қувватлаш топширилган ҳукумат комиссияси тузилган эди.